കൊട്ടിയം: ജങ്ഷനിലെ കടയില്‍ കയറി യുവാവിനെ വെട്ടി പരുക്കേല്‍പ്പിച്ച സംഭവത്തില നാലുപേരെ കൊട്ടിയം പൊലിസ് അറസ്റ്റ് ചെയ്തു.
ഇരവിപുരം കാവല്‍പ്പുര ഉദയ താരാനഗര്‍ 32 പ്രേമാ നിവാസില്‍ റംഷാദ്(32), വടക്കേവിള ഗോപാലശ്ശേരി ഇര്‍ഷാദ് ജങ്ഷന്‍ സനാ മന്‍സിലില്‍ അനസ്(32), കൊല്ലം ജോനകപ്പുറം ചന്ദനഴി കംപുരയിടത്തില്‍ ഹാരീസ്(28),ഇക്ബാല്‍(29) എന്നിവരാണ് പിടിയിലായത്.
സംഘത്തില്‍പ്പെട്ട മറ്റുള്ളവര്‍ക്കായി പൊലിസ് തിരച്ചില്‍ ആരംഭിച്ചിട്ടുണ്ട്.
തിങ്കളാഴ്ച രാത്രി എട്ടു മണിയോടെ കൊട്ടിയം ജങ്ഷനില്‍ കണ്ണനല്ലൂര്‍ റോഡിലുള്ള ബൂട്ട്‌സ് ആന്‍ഡ് ബ്യൂട്ടി എന്ന കട അടിച്ചു തകര്‍ത്ത ശേഷം കടക്കുള്ളില്‍ അഭയം തേടിയെത്തിയ കൊട്ടിയം ജസ്ലറ്റ് ഭവനില്‍ ഐബിന്‍ ആന്റണി(38)യെ സംഘം വെട്ടി പരുക്കേല്‍പിക്കുകയായിരുന്നു.
ആക്രമണം നടത്തുന്നതിനിടെ സംഘത്തില്‍പ്പെട്ട ഒരാള്‍ക്ക് പരുക്കേറ്റതിനെ തുടര്‍ന്ന് സ്വകാര്യ ആശുപത്രിയില്‍ ഇവര്‍ ചികില്‍സ തേടി. സംഭവമറിഞ്ഞ് പിടികൂടാനെത്തിയ കൊട്ടിയം എസ്.ഐ രതീഷിന് നിലത്തുവീണ് കാലിന് പരുക്കേറ്റിരുന്നു.
തുടര്‍ന്ന് കൊട്ടിയം സി.ഐ അജയ് നാഥ്, ജൂനിയര്‍ എസ്.ഐ ട്വിങ്കിള്‍ ശശി, എസ്.ഐമാരായ സുന്ദരേശന്‍, സുനില്‍, സി.പി.ഓ ഗോപന്‍ എന്നിവരുടെ നേതൃത്വത്തിലുള്ള പൊലിസ് സംഘമാണ് പ്രതികളെ പിടികൂടിയത്.
കുറ്റകരമായ നരഹത്യാ ശ്രമത്തിനാണ് ഇവരുടെ പേരില്‍ കേസെടുത്തിട്ടുള്ളത്.