മീനങ്ങാടി: സംസ്ഥാനത്തിന്റെ വിവിധ ഭാഗങ്ങളിലായി മുപ്പതോളം മോഷണക്കേസുകളില്‍ പ്രതിയായ ആളെ മീനങ്ങാടി പൊലിസ് അറസ്റ്റ് ചെയ്തു. ബിദര്‍ക്കാട് നാനക്കല്‍ കബീറാ(വാട്ടര്‍മീറ്റര്‍ കബീര്‍-45)ണ് പൊലിസിന്റെ പിടിയിലായത്. വ്യാഴാഴ്ച രാവിലെ മീനങ്ങാടി കമ്യൂണിറ്റി ഓഡിറ്റോറിയത്തിന് മുന്നില്‍ സംശയാസ്പദമായ സാഹചര്യത്തില്‍ കണ്ട ഇയാളെ പട്രോളിങ് നടത്തുകയായിരുന്ന പൊലിസ് പിടികൂടുകയായിരുന്നു.
പട്രോളിങ് സംഘത്തിലുണ്ടായിരുന്ന എ.എസ്.ഐ എം.അബ്ദുല്‍സലാമിന് മുന്‍പ് പലകേസുകളുമായി ബന്ധപ്പെട്ട് ഇയാളെ പരിചയമുണ്ടായിരുന്നു. ഇതാണ് പ്രതിയെ പിടികൂടാന്‍ സഹായകമായത്. കബീറില്‍ നിന്ന് മൂന്ന് പവനോളം തൂക്കംവരുന്ന വളയും കമ്മലും കണ്ടെടുത്തു. ചേവായൂര്‍ പാറോപ്പടിയിലെ ഒരു വീട്ടില്‍ നിന്ന് മോഷ്ടിച്ചതാണ് ഈ സ്വര്‍ണമെന്ന് പ്രതി പൊലിസിനോട് പറഞ്ഞു. കോഴിക്കോട് മെഡിക്കല്‍ കോളജ്, കോഴിക്കോട് ടൗണ്‍, ചേവായൂര്‍, കുന്നമംഗലം, കസബ, നിലമ്പൂര്‍, മഞ്ചേരി തുടങ്ങിയ പൊലിസ് സ്‌റ്റേഷന്‍ പരിധിയിലായി 30ഓളം മോഷണക്കേസിലെ പ്രതിയാണ് ഇയാളെന്ന് പൊലിസ് അറിയിച്ചു. മുന്‍പ് വാട്ടര്‍ അതോറിറ്റിയുടെ മീറ്റര്‍ സ്ഥിരമായി മോഷ്ടിച്ചിരുന്നതിനാലാണ് ഇയാള്‍ക്ക് വാട്ടര്‍മീറ്റര്‍ കബീര്‍ എന്ന വിളിപ്പേര് വന്നത്.