തിരുവനന്തപുരം: പ്രമുഖ മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകത്തില്‍ പ്രതിഷേധിച്ച് സാംസ്‌കാരിക കൂട്ടായ്മ സംഘടിപ്പിക്കുമെന്ന് യുവജനക്ഷേമ ബോര്‍ഡ് വൈസ് പ്രസിഡന്റ് പി. ബിജു വാര്‍ത്താസമ്മേളനത്തില്‍ പറഞ്ഞു. ഇന്ന് വൈകിട്ട് ആറരയ്ക്ക് പാളയം രക്തസാക്ഷി മണ്ഡപത്തില്‍ ചേരുന്ന പ്രതിഷേധ കൂട്ടായ്മ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. യുവജന ക്ഷേമബോര്‍ഡും കേരള സര്‍വകലാശാലാ യൂനിയനും സംയുക്തമായി സംഘടിപ്പിക്കുന്ന പരിപാടിയില്‍ രാഷ്ട്രീയ സാമൂഹിക സാംസ്‌കാരിക രംഗത്തെ പ്രമുഖര്‍ പങ്കെടുക്കും. കക്ഷിഭേദമന്യേ ഈ അരുംകൊലയ്‌ക്കെതിരേ അണിചേരണമെന്നും പി. ബിജും ആവശ്യപ്പെട്ടു.