വാഷിങ്ടണ്‍: അമേരിക്കന്‍ ബഹിരാകാശ ഏജന്‍സി നാസയുടെ നേതൃത്വത്തിലുള്ള കാസിനി 'ശനി'ദൗത്യത്തിനു പ്രൗഢാന്ത്യം. 20 വര്‍ഷത്തെ ബഹിരാകാശ ദൗത്യം അവസാനിപ്പിച്ച് 'കാസിനി' പേടകം ശനി ഗ്രഹത്തിന്റെ അന്തരീക്ഷത്തില്‍ ഇടിച്ചുതകര്‍ന്നു.
ശനി ഗ്രഹത്തെ കുറിച്ചു പഠിക്കാനായി 1997ല്‍ നാസയും യൂറോപ്യന്‍ സ്‌പേസ് അസോസിയേഷനും ചേര്‍ന്ന് അയച്ച 22 അടി ഉയരമുള്ള പേടകം ഇന്നലെ ഇന്ത്യന്‍ സമയം വേകിട്ട് 6.30ഓടെയാണ് ഇന്ധനം തീര്‍ന്ന് സ്വയം ഉരുക്കിത്തീര്‍ന്നത്. 290 കോടി രൂപ ചെലവായ പേടകം അവസാനമായി ശനി വളയങ്ങളിലൂടെ തെന്നിയിറങ്ങിയാണു ശനിയുടെ അന്തരീക്ഷത്തില്‍ തകര്‍ന്നുവീണത്.
കാലിഫോര്‍ണിയയിലെ പാസാഡെനയിലുള്ള ജെറ്റ് പ്രോപല്‍ഷന്‍ ലബോറട്ടറിയില്‍ വച്ചാണ് അവസാന നിമിഷങ്ങള്‍ നിയന്ത്രിച്ചത്. പേടകം കത്തിത്തീര്‍ന്നതോടെ കാസിനി ദൗത്യത്തിന്റെ മാനേജര്‍ ഏള്‍ മൈസ് സഹപ്രവര്‍ത്തകരെ അഭിനന്ദിച്ച് സംസാരിച്ചു. ഇതൊരു അവിശ്വസനീയ ദൗത്യമാണെന്നും ഇതില്‍ പങ്കെടുത്തത് അവിശ്വസനീയമായ സംഘമാണെന്നും അദ്ദേഹം പറഞ്ഞു.
സൂക്ഷ്മ ദൃശ്യങ്ങള്‍ പകര്‍ത്താന്‍ ശേഷിയുള്ള നാരോ ആംഗിള്‍ കാമറ ഉപയോഗിച്ച് കാസിനി അവസാനമായി ഒപ്പിയെടുത്ത ശനിയുടെ ചിത്രങ്ങള്‍ വെള്ളിയാഴ്ച നാസ പുറത്തുവിട്ടിരുന്നു. ജൂലൈയില്‍ 76,000 കി.മീറ്റര്‍ ദൂരത്തുനിന്നു പകര്‍ത്തിയ ചിത്രം കഴിഞ്ഞ ദിവസമാണ് നാസയ്ക്കു ലഭിക്കുന്നത്.
1997 ഒക്ടോബറില്‍ ഫ്‌ളോറിഡയിലെ കേപ് കനവറലില്‍നിന്നാണ് കാസിനി പേടകത്തെ ബഹിരാകാശത്തേക്കു വിക്ഷേപിച്ചത്. തുടര്‍ന്ന് 2004ല്‍ പേടകം ഭ്രമണപഥത്തിലെത്തി. അമേരിക്കക്കാരിയായ ഡോ. ലിന്‍ഡ സ്പില്‍ക്കറാണ് ദൗത്യത്തിനു നേതൃത്വം നല്‍കിയത്.
13 വര്‍ഷം നിരീക്ഷണങ്ങളും പഠനങ്ങളും തുടര്‍ന്ന കാസിനി ശനിയെ കുറിച്ച് ശാസ്ത്രലോകത്തിനു കൗതുകകരമായ പല വിവരങ്ങളും ചിത്രങ്ങളും പുറത്തുവിട്ടിരുന്നു.