കോഴിക്കോട്: മീഞ്ചന്ത ആര്‍ട്‌സ് കോളജിനു സമീപത്തു നടന്ന വാഹന പരിശോധനയ്ക്കിടെ കാറില്‍ നിന്ന് 22 പൊതി ബ്രൗണ്‍ ഷുഗറുമായി യുവാവ് പിടിയില്‍. നല്ലളം സ്വദേശി കീഴുവനപ്പാടം ജയന്തി റോഡില്‍ കുന്നത്ത്‌വീട്ടില്‍ കെ.വി അന്‍വര്‍ സാദിഖിനെ (34) യാണ് ഫറോക്ക് എക്‌സൈസ് റെയ്ഞ്ച് സംഘം അറസ്റ്റ് ചെയ്തത്. ഫോണ്‍വഴി വിദ്യാര്‍ഥികള്‍ക്കിടയില്‍ ബ്രൗണ്‍ ഷുഗര്‍ വില്‍പന നടത്തുന്ന സംഘത്തിലെ അംഗമാണ് ഇയാള്‍.
തലശ്ശേരി കേന്ദ്രീകരിച്ച് പ്രവര്‍ത്തിക്കുന്ന മൊത്തവിതരണക്കാരില്‍ നിന്നു വാങ്ങി ആവശ്യക്കാര്‍ക്ക് സാധനം എത്തിച്ചുകൊടുക്കലാണ് ഇയാളുടെ രീതി. പരിശോധനയ്ക്ക് എക്‌സൈസ് റെയ്ഞ്ച് ഇന്‍സ്‌പെക്ടര്‍ ആര്‍.പി പീതാബരന്‍, അസി.എക്‌സൈസ് ഇന്‍സ്‌പെക്ടര്‍ ടി.കെ നിഷില്‍ കുമാര്‍, പ്രിവന്റീവ് ഓഫിസര്‍ ബി. യുഗേഷ്, സിവില്‍ എക്‌സൈസ് ഓഫിസര്‍മാരായ ടി. ഗോവിന്ദന്‍, പി. വിപിന്‍, ടി.കെ രാഗേഷ്, എ.എം ജിനീഷ്, എന്‍. ജലാലുദ്ദീന്‍, ആര്‍. രഞ്ജിത്ത്, ഡ്രൈവര്‍ അനില്‍ കുമാര്‍ നേതൃത്വം നല്‍കി.