തിരുവനന്തപുരം: നെല്‍വയല്‍ ഡാറ്റാബാങ്കില്‍ തിരുത്തലുകള്‍ വരുത്തുന്നതിനുള്ള അപേക്ഷകള്‍ നല്‍കാനുള്ള സമയപരിധി ദീര്‍ഘിപ്പിച്ചു. അഡീ. ചീഫ് സെക്രട്ടറി (റവന്യൂ), കാര്‍ഷികോല്‍പാദന കമ്മിഷണര്‍ എന്നിവരുടെ അധ്യക്ഷതയില്‍ ചേര്‍ന്ന കൃഷി ഓഫിസര്‍മാരുടേയും പ്രിന്‍സിപ്പല്‍ കൃഷി ഓഫിസര്‍മാരുടേയും വിഡിയോ കോണ്‍ഫറന്‍സിലാണ് തീരുമാനം. ഡാറ്റാബാങ്ക് പ്രസിദ്ധീകരിക്കാനുള്ള 159 തദ്ദേശ സ്ഥാപനങ്ങള്‍ കേരള സ്റ്റേറ്റ് റിമോട്ട് സെന്‍സിങ് ആന്‍ഡ് എന്‍വയോണ്‍മെന്റ് സെന്ററിന്റെ ശാസ്ത്രീയ പരിശോധനയ്ക്ക് വിധേയമാക്കി ഡാറ്റാബാങ്ക് കുറ്റമറ്റതാക്കി പ്രസിദ്ധീകരിക്കാനുള്ള നടപടികള്‍ അടിയന്തരമായി പൂര്‍ത്തീകരിക്കാനും നിര്‍ദേശം നല്‍കി.
ഡാറ്റാബാങ്ക് തിരുത്തുന്നതിന് ഉടമസ്ഥന്റെ പേര്, സര്‍വേ നമ്പര്‍, തണ്ടപ്പേര്‍, ഉദ്ദേശിക്കുന്ന പരിഹാര മാര്‍ഗം എന്നിവ ഉള്‍പ്പെടുത്തി 100 രൂപ കോര്‍ട്ട് ഫീ സ്റ്റാമ്പ് പതിപ്പിച്ച വെള്ള പേപ്പറില്‍ കൃഷി ഓഫിസര്‍മാര്‍ക്കാണ് അപേക്ഷ നല്‍കേണ്ടത്. സംസ്ഥാനത്തൊട്ടാകെ ഇതുവരെ 1,12,896 അപേക്ഷകള്‍ ലഭിച്ചിട്ടുണ്ട്.