ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മാഞ്ചസ്റ്റര്‍ സിറ്റിക്ക് ഉജ്ജ്വല വിജയം. ചാംപ്യന്‍സ് ലീഗ് പോരാട്ടത്തിലെ ഗോളടിയുടെ തുടര്‍ച്ച പ്രീമിയര്‍ ലീഗിലേക്ക് പടര്‍ത്തിയ സിറ്റി വാട്‌ഫോര്‍ഡിനെ അവരുടെ തട്ടകത്തില്‍ മറുപടിയില്ലാത്ത ആറ് ഗോളുകള്‍ക്ക് തകര്‍ത്തെറിഞ്ഞു. സെര്‍ജിയോ അഗ്യെറോ നേടിയ ഹാട്രിക്ക് ഗോളുകളുടെ മികവിലാണ് സിറ്റിയുടെ വിജയം. ജയത്തോടെ സിറ്റി തലപ്പത്തെത്തി. മറ്റൊരു മത്സരത്തില്‍ ലിവര്‍പൂള്‍ ബേണ്‍ലിയുമായി 1-1ന് സമനിലയില്‍ പിരിഞ്ഞു. മറ്റ് മത്സരങ്ങളില്‍ ബേണ്‍മൗത്ത് 2-1ന് ബ്രൈറ്റന്‍ ഹോവ് ആല്‍ബിയോണിനേയും സതാംപ്ടന്‍ 1-0ത്തിന് ക്രിസ്റ്റല്‍ പാലസിനേയും പരാജയപ്പെടുത്തി. റോയ് ഹോഡ്‌സന്‍ പരിശീലകനായി ചുമതലയേറ്റിട്ടും ക്രിസ്റ്റലിന്റെ തോല്‍വിക്ക് തടയിടാനായില്ല. ഹഡ്ഡേഴ്‌സ് ഫീല്‍ഡ്- ലെയ്സ്റ്റര്‍ സിറ്റി പോരാട്ടം 1-1നും വെസ്റ്റ് ബ്രോംവിച്- വെസ്റ്റ് ഹാം പോരാട്ടം ഗോള്‍രഹിതവുമായി തുല്ല്യതയില്‍ പിരിഞ്ഞു.

വിജയം തുടര്‍ന്ന് ബാഴ്‌സ
മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ ബാഴ്‌സലോണ വിജയം തുടര്‍ന്നു. ഒന്നിനെതിരേ രണ്ട് ഗോളുകള്‍ക്ക് അവര്‍ ഗെറ്റാഫയെ പരാജയപ്പെടുത്തി. മറ്റ് മത്സരങ്ങളില്‍ എയ്ബര്‍ 1-0ത്തിന് ലെഗാനെസിനെ വീഴ്ത്തിയപ്പോള്‍ ലെവാന്റെ- വലന്‍സിയ 1-1ന് സമനിലയില്‍ പിരിഞ്ഞു.

ബയേണ്‍ വിജയ വഴിയില്‍
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയേണ്‍ മ്യൂണിക്ക് വിജയ വഴിയില്‍ തിരിച്ചെത്തി. മറുപടിയില്ലാത്ത നാല് ഗോളുകള്‍ക്ക് അവര്‍ മെയ്ന്‍സിനെ വീഴ്ത്തി. മറ്റ് മത്സരങ്ങളില്‍ ലീഗിലേക്ക് സ്ഥാനക്കയറ്റം കിട്ടിയെത്തിയ ഹന്നോവര്‍ 2-0ത്തിന് ഹാംബര്‍ഗറിനെ വീഴ്ത്തി പട്ടികയില്‍ ഒന്നാമതെത്തി. ഓഗ്‌സ്ബര്‍ 2-1ന് ഫ്രാങ്ക്ഫര്‍ടിനേയും ഷാല്‍കെ ഇതേ സ്‌കോറിന് വെര്‍ഡര്‍ ബ്രമനേയും പരാജയപ്പെടുത്തി. സ്റ്റുട്ട്ഗര്‍ട് 1-0ത്തിന് വോള്‍വ്‌സ്ബര്‍ഗിനെ പരാജയപ്പെടുത്തി.

ഇന്ററിന് ജയം
മിലാന്‍: ഇറ്റാലിയന്‍ സീരി എയില്‍ ഇന്റര്‍ മിലാന് വിജയം. മറുപടിയില്ലാത്ത രണ്ട് ഗോളുകള്‍ക്ക് അവര്‍ ക്രോടോണിനെ വീഴ്ത്തി. ഫ്രഞ്ച് ലീഗ് വണില്‍ നിലവിലെ ചാംപ്യന്‍മാരായ മൊണാക്കോയ്ക്ക് വിജയം. മറുപടിയില്ലാത്ത മൂന്ന് ഗോളുകള്‍ക്ക് അവര്‍ സ്ട്രാസ്ബര്‍ഗിനെ പരാജയപ്പെടുത്തി. മറ്റൊരു മത്സരത്തില്‍ ബോര്‍ഡെക്‌സ് 1-0ത്തിന് ടോളൗസിനെ വീഴ്ത്തി.