തലശ്ശേരി: ഭിന്നശേഷിക്കാരനായ 17കാരന് പൊലിസ് മര്‍ദനം. മുഴപ്പിലങ്ങാട് കൂടക്കടവ് ഗേറ്റിന് സമീപം റഫ്‌നാസ് മഹലില്‍ കെ.വി റഫീഖിനെ പരുക്കുകളോടെ തലശ്ശേരി സഹകരണ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം മുഴപ്പിലങ്ങാട് പൊലിസ് സ്റ്റേഷനില്‍ വിളിച്ചുവരുത്തിയ യുവാവിനെ എസ്.ഐ മഹേഷ് ചവിട്ടുകയും മര്‍ദിക്കുകയും ചെയ്തതായാണ് പരാതി.
ശ്രീകൃഷ്ണ ജയന്തിയോടനുബന്ധിച്ച് കൂടക്കടവ് പ്രദേശത്ത് ബി.ജെ.പി-ആര്‍.എസ്.എസ് പ്രവര്‍ത്തകര്‍ ഉയര്‍ത്തിയ കൊടിതോരണങ്ങള്‍ നശിപ്പിക്കപ്പെട്ടിരുന്നു.
ഇതിന് പിന്നില്‍ റഫീഖാണെന്ന് ആരോപിച്ചായിരുന്നു പൊലിസ് മര്‍ദനം. ആഴ്ചകള്‍ക്ക് മുന്‍പാണ് റഫീഖിന്റെ കണ്ണ് ശസ്ത്രക്രിയക്ക് വിധേയമാക്കിയത്. ശാരീരികമായ ബുദ്ധിമുട്ടനുഭവിക്കുന്ന റഫീഖ് പരസഹായത്താലാണ് സ്വന്തം കാര്യങ്ങള്‍ പോലും നിര്‍വഹിക്കുന്നതെന്ന് ബന്ധുക്കള്‍ പറഞ്ഞു.