ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മാഞ്ചസ്റ്റര്‍ യുനൈറ്റഡിന് തകര്‍പ്പന്‍ ജയം. മറുപടിയില്ലാത്ത നാല് ഗോളുകള്‍ക്ക് അവര്‍ എവര്‍ട്ടനെ കീഴടക്കി. ആദ്യമായി തന്റെ മുന്‍ ക്ലബിനെതിരേ എവര്‍ട്ടന്‍ കുപ്പായത്തിലിറങ്ങിയ പോരാട്ടം വെയ്ന്‍ റൂണിക്ക് നിരാശപ്പെടുത്തുന്നതായി മാറി. അന്റോണിയോ വലന്‍സിയ, മിഖിതാര്യന്‍, ലുകാകു, ആന്റണി മാര്‍ഷ്യല്‍ എന്നിവരാണ് റെഡ് ഡെവിള്‍സിനായി വല ചലിപ്പിച്ചത്. ജയത്തോടെ മാഞ്ചസ്റ്റര്‍ യുനൈറ്റഡ് പട്ടികയില്‍ രണ്ടാം സ്ഥാനത്ത്. മറ്റൊരു മത്സരത്തില്‍ നിലവിലെ ചാംപ്യന്‍മാരായ ചെല്‍സിയും കരുത്തരായ ആഴ്‌സണലും ഗോള്‍രഹിത സമനിലയില്‍ പിരിഞ്ഞു. ടോട്ടനം- സ്വാന്‍സീ സിറ്റി മത്സരവും ഗോള്‍രഹിത സമനില.

അത്‌ലറ്റിക്കോയ്ക്ക് വിജയം
മാഡ്രിഡ്: സ്പാനിഷ് ലാ ലഗയില്‍ അത്‌ലറ്റിക്കോ മാഡ്രിഡ്, വിയ്യാറല്‍ ടീമുകള്‍ക്ക് വിജയം. അത്‌ലറ്റിക്കോ മറുപടിയില്ലാത്ത ഒറ്റ ഗോളിന് മലാഗയെ വീഴ്ത്തിയപ്പോള്‍ വിയ്യാറല്‍ 3-0ത്തിന് ഡിപോര്‍ടീവോ ആല്‍വെസിനെ പരാജയപ്പെടുത്തി.

യുവന്റസിനെ പിന്തള്ളി നാപോളി
മിലാന്‍: ഇറ്റാലിയന്‍ സീരി എയില്‍ യുവന്റസ്, റോമ, നാപോളി, എ.സി മിലാന്‍ ടീമുകള്‍ക്ക് വിജയം.
യുവന്റസ് 3-1ന് സസോളോയേയും റോമ 3-0ത്തിന് വെറോണയേയും മിലാന്‍ 2-1ന് ഉദീനിസെയേയും പരാജയപ്പെടുത്തി.
നാപോളി 6-0ത്തിന് ബെനവെന്റോയെ തകര്‍ത്തു. ഗോള്‍ ശരാശരിയില്‍ യുവന്റസിനെ പിന്തള്ളി നാപോളി പട്ടികയില്‍ ഒന്നാം സ്ഥാനത്തേക്ക് കയറി. കഗ്ലിയാരി 2-0ത്തിന് എസ്.പി.എ.എല്ലിനെ കീഴടക്കിയപ്പോള്‍ ടൊറിനോ- സംപ്‌ഡോറിയ മത്സരം 2-2ന് സമനില.

ലെവര്‍കൂസന് ജയം
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയര്‍ലെവര്‍കൂസന് വിജയം. അവര്‍ 4-0ത്തിന് ഫ്രീബര്‍ഗിനെ തകര്‍ത്തു. ഹോഫെന്‍ഹെയിം- ഹെര്‍ത പോരാട്ടം 1-1നും ലെയ്പ്‌സിഗ്- മോണ്‍ചെന്‍ഗ്ലാഡ്ബാച് മത്സരം 2-2നും സമനില.