മലപ്പുറം: കനത്ത മഴയില്‍ ജില്ലയില്‍ വ്യാപക നാശനഷ്ടം. കഴിഞ്ഞ ദിവസം രാവിലെ മുതല്‍ തുടങ്ങിയ മഴ ഇന്നലെ രാത്രി വൈകിയും തുടരുകയാണ്. മഴയിലും കാറ്റിലും വ്യാപകനാശനഷ്ടവുമുണ്ടായിട്ടുണ്ട്. ജില്ലയിലെ താഴ്ന്ന പ്രദേശങ്ങള്‍ വെള്ളത്തില്‍ മുങ്ങി.
നഗരങ്ങളിലും റോഡുകളിലും വെള്ളം നിറഞ്ഞു. പലയിടങ്ങളിലും ഗതാഗതം തടസപ്പെട്ടു. മഴയോടൊപ്പം ഉണ്ടാകുന്ന കാറ്റില്‍ വ്യാപക കൃഷിനാശമാണുണ്ടായത്. ജില്ലയിലെ പുഴകളും തോടുകളും നിറഞ്ഞുകവിഞ്ഞു.
കാറ്റില്‍ മരങ്ങള്‍ കടപുഴകി വീണതുമൂലം വിവിധയിടങ്ങളില്‍ വൈദ്യുതി വിതരണം തടസപ്പെട്ടു. ചിലയിടങ്ങളില്‍ വീടുകളിലും വെള്ളം കയറി. വീടിനു മുകളിലേക്കു മരങ്ങള്‍ കടപുഴകിയതിനെ തുടര്‍ന്ന് നിരവധി വീടുകള്‍ തകര്‍ന്നിട്ടുണ്ട്.
റോഡുകളില്‍ മരണംവീണു ഗതാഗത തടസവുമുണ്ടായി. മഴശക്തമായതിനെ തുടര്‍ന്നു ജില്ലാ പൊലിസ് മേധാവിമാര്‍ക്കു സംസ്ഥാന പൊലിസ് മേധാവി ജാഗ്രതാ നിര്‍ദേശം നല്‍കിയിട്ടുണ്ട്. പ്രകൃതിക്ഷോഭങ്ങളും നാശനഷ്ടങ്ങളും നേരിടാന്‍ അടിയന്തര നടപടി സ്വീകരിക്കാനും അപകടസാധ്യത സംബന്ധിച്ചു മുന്നറിയിപ്പ് നല്‍കാനുമാണ് നിര്‍ദേശം.
കനത്ത മഴയെ തുടര്‍ന്ന് ഇന്നു സംസ്ഥാനത്തെ മുഴുവന്‍ വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍ അവധി പ്രഖ്യാപിച്ചിരിക്കുകയാണ്. ആദ്യം നാലു ജില്ലകളില്‍ മാത്രമേ അവധി പ്രഖ്യാപിച്ചിരുന്നുള്ളൂവെങ്കിലും മഴ ശക്തമായതിനെ തുടര്‍ന്നു മലപ്പുറം ഉള്‍പ്പെടെയുള്ള മുഴുവന്‍ ജില്ലകളിലും അവധി പ്രഖ്യാപിക്കുകയായിരുന്നു.