നെയ്യാറ്റിന്‍കര: തിരുവാതാംകൂര്‍ ദേവസ്വം ബോര്‍ഡിനു കീഴിലുളള നെയ്യാറ്റിന്‍കര ശ്രീകൃഷ്ണ സ്വാമി ക്ഷേത്രത്തിലെ കണ്ണനെന്ന കൊമ്പനെ ചികിത്സിക്കുവാനായി അഞ്ചു പേര്‍ അടങ്ങുന്ന വിദഗ്ധ സംഘം നെയ്യാറ്റിന്‍കര കൃഷ്ണന്‍ കോവിലിലെത്തി കണ്ണനെ പരിശോധിച്ചു.
വെറ്ററിനറി ഓഫിസര്‍ ഡോ.സുനില്‍കുമാര്‍, ക്ലിനിക്കല്‍ മെഡിസിന്‍ കോളേജ് ഒഫ് വെറ്ററിനറി ആന്‍ഡ് അനിമല്‍ സയന്‍സ് അസി.പ്രൊഫ ഡോ.മാധവനുണ്ണി , എലിഫന്റ് സ്‌പെഷ്യല്‍ ഗ്രൂപ്പ് അംഗങ്ങളായ ഡോ.പി.എസ് ഈസ, ഡോ.വി സുനില്‍കുമാര്‍, ഡോ. ഗിരീഷ്‌കുമാര്‍ എന്നിവരുള്‍പ്പെടുന്ന സംഘമാണ് പരിശോധനക്കായി എത്തിയത്. രക്തമുള്‍പ്പെടെയുള്ളവ പരിശോധനയ്ക്കായി ശേഖരിച്ചു. കണ്ണന്റെ ആരോഗ്യ നില തൃപ്തികരമല്ലെന്നും അടിയന്തര ചികിത്സക്ക് വിധേയമാക്കണമെന്നും പ്രാഥമിക പരിശോധനയില്‍ കണ്ടെത്തി.
2014 ലും ഇതേ ഡോക്ടര്‍മാര്‍ പരിശോധനക്കെത്തുകയും കണ്ണന്റെ ആരോഗ്യനില തൃപ്തികരമല്ലന്ന് കണ്ടെത്തുകയും ചികിത്സ നടത്തുകയും ചെയ്തിരുന്നു. എന്നിട്ടും ആരോഗ്യനില പൂര്‍വ സ്ഥിതിയില്‍ കൊണ്ടുവരാന്‍ കഴിഞ്ഞിരുന്നില്ല. എന്നാല്‍ ഇനിയുളള ചികിത്സ പൂര്‍ണമായും കണ്ണന്റെ ആരോഗ്യം തിരിച്ചു കൊണ്ടുവരാനുള്ള തരത്തില്‍ ഉടന്‍ ആരംഭിക്കുമെന്നും സംഘം അറിയിച്ചു.