മലപ്പുറം: പട്ടിക്കാട് ജാമിഅ നൂരിയ്യ അറബിക് കോളജിന്റെ വാര്‍ഷിക സമ്മേളനത്തിന്റെ ഭാഗമായി നടത്തുന്ന 6-ാമത് ജാമിഅ ദര്‍സ് ഫെസ്റ്റ് 2017-18 സംസ്ഥാനത്ത് പന്ത്രണ്ട് മേഖലകളിലായി നടക്കും. കൊല്ലം, തൃശൂര്‍, പാലക്കാട്, കോട്ടക്കല്‍, ചേളാരി, വണ്ടൂര്‍, കോഴിക്കോട്, വടകര, കണ്ണൂര്‍, കാസര്‍കോട്, മംഗലാപുരം, വയനാട് എന്നീ മേഖലകളിലാണ് ഫെസ്റ്റ് നടക്കുക. സീനിയര്‍-ജൂനിയര്‍ വിഭാഗങ്ങളിലായി 56 ഇനങ്ങളിലാണ് മത്സരങ്ങള്‍ സംഘടിപ്പിക്കുന്നത്.
ഒക്ടോബര്‍ 25 ന് മുന്‍പ് സ്ഥാപന തല മത്സരങ്ങളും നവംബര്‍-ഡിസംബര്‍ മാസങ്ങളില്‍ മേഖലാ തല മത്സരങ്ങളും നടക്കും. ഫൈനല്‍ മത്സരം അടുത്ത വര്‍ഷം ജനുവരി രണ്ടാം വാരത്തില്‍ പട്ടിക്കാട് നടക്കും.
സ്ഥാപന തല മത്സരത്തില്‍ ഒന്നാം സ്ഥാനം നേടിയവര്‍ മേഖലാ തല മത്സരത്തിനും മേഖലാ തലത്തില്‍ ഒന്നും രണ്ടും സ്ഥാനം നേടിയവര്‍ ഫൈനല്‍ മത്സരത്തിനും യോഗ്യരായിരിക്കും. അപേക്ഷാ ഫോമും നിയമാവലിയും ജാമിഅ ഓഫിസിലും മലപ്പുറം സുന്നി മഹലിലും ംംം.ഷമാശമറമൃളെലേെ.രീാ വെബ്‌സൈറ്റിലും ലഭ്യമാണ്. മത്സരാര്‍ഥികള്‍ ഒക്ടോബര്‍ 20ന് മുന്‍പായി അപേക്ഷാ ഫോമുകള്‍ മേഖലാ കണ്‍വീനര്‍മാരെ ഏല്‍പ്പിക്കണമെന്ന് ജാമിഅ പ്രിന്‍സിപ്പല്‍ പ്രൊഫ. കെ ആലിക്കുട്ടി മുസ്‌ലിയാരും ഫെസ്റ്റ് സംസ്ഥാന കണ്‍വീനര്‍ അബ്ദുല്‍ ഖാദിര്‍ ഫൈസി കുന്നുംപുറവും അറിയിച്ചു. വിശദവിവരങ്ങള്‍ക്ക് 9747505550, 9846154885.