പേരാമ്പ്ര: വെള്ളിയൂരിലെ പുതിയോട്ടുകണ്ടി ബാലകൃഷ്ണന്റെ മകളും പാരലല്‍ കോളജ് അധ്യാപികയുമായ ജിന്‍സി (24) ആത്മഹത്യ ചെയ്ത സംഭവത്തില്‍ പ്രതിശ്രുതവരന്‍ വേളം പെരുവയല്‍ സ്വദേശി തട്ടാന്റെ മീത്തല്‍ സന്ദീപിനെ പേരാമ്പ്ര കോടതി ഈ മാസം 28 വരെ റിമാന്‍ഡ് ചെയ്തു.
376, 306 വകുപ്പുകളാണ് പ്രതിക്കെതിരേ ചുമത്തിയിരിക്കുന്നത്. ആത്മഹത്യാപ്രേരണ കൂടാതെ ലൈംഗിക പീഡനത്തിനും യുവാവിനെതിരേ പേരാമ്പ്ര പൊലിസ് കേസെടുത്തിരുന്നു. പല ലോഡ്ജുകളിലായി കൊണ്ടുപോയി യുവതിയെ പീഡിപ്പിച്ചതായി ആത്മഹത്യാ  കുറിപ്പില്‍ പറയുന്നുണ്ട്.
ഓരോ കാരണങ്ങള്‍ പറഞ്ഞ് സന്ദീപ് ജിന്‍സിയെ നിരന്തരം മാനസികമായി പീഡിപ്പിച്ചിരുന്നതായും രക്ഷിതാക്കള്‍ പരാതിയില്‍ സൂചിപ്പിച്ചു. വിവാഹം നിശ്ചയിക്കുകയും ക്ഷണക്കത്തടിച്ച് ആളുകളെ വിളിക്കുകയും ചെയ്യുന്നതിനിടെ സന്ദീപ് പിന്മാറുകയായിരുന്നു. നവംബര്‍ മാസം നടക്കേണ്ട കല്യാണത്തിന്റെ ക്ഷണം യുവതിയുടെ വീട്ടുകാര്‍ ബഹുഭൂരിപക്ഷവും പൂര്‍ത്തിയാക്കിയതാണ്. കല്യാണം മുടങ്ങിയ മനോവിഷമത്തിലാണ് ജിന്‍സി കഴിഞ്ഞ വ്യാഴാഴ്ച വൈകിട്ട് ജീവനൊടുക്കിയത്. പേരാമ്പ്ര സി.ഐ സുനില്‍കുമാന്റെ നേതൃത്വത്തിലായിരുന്നു പ്രതിയുടെ അറസ്റ്റ്.