നീലേശ്വരം: ദേശീയപാതയിലെ പണ്ടള്ളിക്കരയില്‍ റെയില്‍വേ മേല്‍പാലത്തിന്റെ നിര്‍മാണം ഉടന്‍ ആരംഭിക്കണമെന്നാവശ്യപ്പെട്ട് പി. കരുണാകരന്‍ എം.പിയുടെ നേതൃത്വത്തില്‍ അനിശ്ചിതകാല സമരം ആരംഭിച്ചു. സമരം സി.പി.എം. കേന്ദ്രകമ്മിറ്റി അംഗവും എം.പിയുണ്ടമായ പി.കെ ശ്രീമതി ഉദ്ഘാടനം ചെയ്തു. സി.പി.ഐ ജില്ലാ സെക്രട്ടറി ഗോവിന്ദന്‍ പള്ളിക്കാപ്പില്‍ അധ്യക്ഷനായി. മാറി നില്‍ക്കുന്നവര്‍ സമരത്തോടൊപ്പം ചേരാന്‍ തയാറാകണമെന്നു പി.കരുണാകരന്‍ എം.പി അഭ്യര്‍ഥിച്ചു. സമരം നടത്താതെ തന്നെ പ്രശ്‌ന പരിഹാരമുണ്ടാകുമെന്ന പ്രതീക്ഷയുണ്ടായിരുന്നു. അതു കൊണ്ടാണു സമരം തുടങ്ങാന്‍ വൈകിയതെന്നും എം.പി കൂട്ടിച്ചേര്‍ത്തു.
കെ. കുഞ്ഞിരാമന്‍ എം.എല്‍.എ, ജില്ലാ പഞ്ചായത്ത് അംഗങ്ങളായ വി.പി.പി മുസ്തഫ, ജോസ് പതാല്‍, നഗരസഭാ ചെയര്‍മാന്‍മാരായ പ്രൊഫ.കെ.പി ജയരാജന്‍, വി.വി രമേശന്‍, പഞ്ചായത്ത് പ്രസിഡന്റുമാരായ സി. പ്രഭാകരന്‍, എ. വിധുബാല, സി.പി.എം ജില്ലാ സെക്രട്ടറി കെ.പി സതീഷ് ചന്ദ്രന്‍, മുന്‍ എം.എല്‍.എ കെ. കുഞ്ഞിരാമന്‍, ഇടതുമുന്നണി ജില്ലാ കണ്‍വീനര്‍ പി. രാഘവന്‍, വിവിധ കക്ഷി നേതാക്കളായ ബങ്കളം കുഞ്ഞികൃഷ്ണന്‍, എം. അസിനാര്‍, കെ. ബാലകൃഷ്ണന്‍, പി. ജനാര്‍ദ്ദനന്‍, പൊള്ളയില്‍ അമ്പാടി, കൈപ്രത്ത് കൃഷ്ണന്‍ നമ്പ്യാര്‍, പി.പി രാജു, ജോണ്‍ ഐമന്‍, വി.കെ ഹനീഫ ഹാജി, വി.വി ഗോവിന്ദന്‍ , കെ.വി കൃഷ്ണന്‍ മാസ്റ്റര്‍, എ. ഹമീദ് ഹാജി, ഡി.വൈ.എഫ്.ഐ ജില്ലാ സെക്രട്ടറി കെ. മണികണ്ഠന്‍, ലയണ്‍സ് ക്ലബ് പ്രതിനിധി ഇടയില്ലം രാധാകൃഷ്ണന്‍ , നീലേശ്വരം പ്രസ് ഫോറം സെക്രട്ടറി ശ്യാംബാബു വെള്ളിക്കോത്ത് എന്നിവര്‍ സംസാരിച്ചു.
പി.കരുണാകരന്‍ എം.പി യോടൊപ്പം ഭാര്യയും സമരമുഖത്തിയിരുന്നു. എ.കെ.ജിയുടെ മകള്‍ കൂടിയായ എ.കെ ലൈല സമരപന്തലില്‍ ആദ്യം മുതല്‍ക്കുതന്നെയുണ്ട്. സത്യാഗ്രഹം തുടങ്ങിയ എം.പിയെ ചുവന്ന ഹാരമണിയിച്ച് ഹസ്തദാനം ചെയ്തു.
ടി.വി രാജേഷ് എം.എല്‍.എ, സംവിധായകന്‍ ഷാജി എന്‍. കരുണ്‍ എന്നിവര്‍ സന്ദര്‍ശിച്ചു.