ആലുവ: നഗരമധ്യത്തിലെ അപകടാവസ്ഥയിലായ കെട്ടിടം പൊളിച്ചുനീക്കാത്തതില്‍ അധികൃതരുടെ ഒത്തുകളിയെന്ന് ആക്ഷേപം. ആലുവ മാര്‍ക്കറ്റ് റോഡില്‍ ബാങ്ക് കവല ഗ്രാന്റ് ജങ്ഷനിലെ അപകടാവസ്ഥയിലായ കെട്ടിടത്തിന്റെ കാര്യത്തിലാണ് അധികൃതര്‍ യാതൊരു നടപടിയും സ്വീകരിക്കാത്തത്.
കാലപ്പഴക്കം മൂലം അപകടാവസ്ഥയിലായ കെട്ടിടത്തിന്റെ ഒരു ഭാഗം ഒരു മാസം മുന്‍പ് തകര്‍ന്ന് വീണിരുന്നു. ഈ സമയം നഗരസഭ അടക്കം കെട്ടിടം പൊളിച്ചുനീക്കാന്‍ ഉടമയ്ക്ക് നോട്ടീസ് നല്‍കിയിരുന്നു. എന്നാല്‍ കെട്ടിടത്തിലെ കടയുടമകളാരും തന്നെ കടകളൊഴിയാന്‍ തയ്യാറായില്ല.
ഇതിനിടെ നഗരസഭയിലെ ചില ഉദ്യോഗസ്ഥരുടെ ഒത്താശയോടെ കെട്ടിടം രഹസ്യമായി നേരിയ തോതില്‍ അറ്റകുറ്റപ്പണി നടത്തിയിരുന്നു. ഇതിനിടെ കഴിഞ്ഞ ദിവസത്തെ കനത്ത മഴയില്‍ കെട്ടിടത്തിന്റെ ഒരു ഭാഗം കൂടി തകര്‍ന്നിരുന്നു. തിരക്കേറിയ റോഡിന് സമീപത്തെ കെട്ടിടം ഏത് സമയത്തും നിലംപൊത്താവുന്ന അവസ്ഥയില്‍ നിലനില്‍ക്കെ, വഴിയാത്രക്കാരടക്കം ഭീതിയിലാണ്.