കോവളം: പാച്ചല്ലൂരിലെ പലവ്യജ്ഞന കടയില്‍ നിന്നും മോഷണം പോയ പണം സൂക്ഷിച്ചിരുന്ന ടിന്നുകള്‍ കടയുടെ സമീപത്തെ കിണറ്റില്‍ നിന്നും കണ്ടെത്തി. പാച്ചല്ലൂര്‍ കുമളി മണലിവിളാകത്ത് ഇക്ബാലിന്റെ വീടിനു സമീപത്തെ കടയില്‍ കഴിഞ്ഞ 15ന് രാത്രിയാണ് മോഷണം നടന്നത്. കടയുടെ പിന്‍വാതില്‍ പൊളിച്ച് കടയ്ക്കുള്ളില്‍ കയറിയ മോഷ്ടാക്കള്‍ 5 ടിന്നുകളിലായി സൂക്ഷിച്ചിരുന്ന 65000 രൂപ ടിന്നുകള്‍ ഉല്‍പ്പടെ കവര്‍ന്നിരുന്നു. ഈ ടിന്നുകള്‍ കടയുടെ സമീപം താമസിക്കുന്ന ഇക്ബാലിന്റെ പരേതനായ സഹോദരന്‍ ഷറഫുദ്ദീന്റെ വീട്ടിലെ കിണറ്റില്‍ നിന്നും ഇന്നലെ രാവിലെ കണ്ടെത്തുകയായിരുന്നു. ഷറഫുദീന്റെ ഭാര്യ കിണറ്റില്‍ നിന്നും വെള്ളം കോരുന്നതിനിടെയാണ് ഇവ കിട്ടിയത്. വീട്ടുകാര്‍ വിവരം അറിയിച്ചതിനെത്തുടര്‍ന്ന് തിരുവല്ലം പൊലീസ് സ്ഥലത്തെത്തി ടിന്നുകള്‍ പരിശോധിച്ചു.