ബന്തിയോട്: കര്‍ണാടകയില്‍ ബാര്‍ ഉടമയായ മുട്ടം സ്വദേശിയെ തോക്ക് ചൂണ്ടി ഭീഷണിപ്പെടുത്തി പണം ആവശ്യപ്പെട്ട കേസില്‍ യുവാവ് അറസ്റ്റില്‍. പെര്‍മുദെ പള്ളം ഹൗസിലെ നൗഷാദ് എന്ന മൊയിഞ്ഞി (32)യാണ് അറസ്റ്റിലായത്. തൊക്കോട്ടെ ബാറുടമ മുട്ടത്തെ ശ്രീധരഷെട്ടിയെ വീട്ടിലെത്തിയ ഏഴംഗ സംഘം തോക്കു ചൂണ്ടി ഭീഷണിപ്പെടുത്തി പണം ആവശ്യപ്പെട്ട കേസിലാണ് അറസ്റ്റ്. കഴിഞ്ഞ മാര്‍ച്ച് മൂന്നിനാണു സംഭവം. അധോലോക സംഘാംഗം കലി യോഗേഷിന്റെ നേതൃത്വത്തിലുള്ള സംഘമാണു പണം തട്ടിയെടുക്കാന്‍ ശ്രമിച്ചതിനു പിന്നിലെന്നു പൊലിസ് അന്വേഷണത്തില്‍ വ്യക്തമായിരുന്നു. കലി യോഗേഷാണു കേസില്‍ ഒന്നാം പ്രതി. ഇന്നലെ അറസ്റ്റിലായ നൗഷാദ് കേസില്‍ അഞ്ചാം പ്രതിയാണെന്നു പൊലിസ് പറഞ്ഞു.
കുമ്പള എസ്.ഐ ജയശങ്കര്‍, അഡി. എസ്.ഐമാരായ പി.വി വിജയന്‍, സദാശിവന്‍ എന്നിവരുടെ നേതൃത്വത്തില്‍ ഇന്നലെ പെര്‍മുദെയില്‍ വച്ചാണു നൗഷാദിനെ അറസ്റ്റു ചെയ്തത്. കറുവപ്പാടിയിലെ ഇബ്രാഹിം ഖലീല്‍, ബായാറിലെ ആബിദ് എന്നിവരെ സംഭവവുമായി ബന്ധപ്പെട്ടു നേരത്തെ അറസ്റ്റ് ചെയ്തിരുന്നു. കലി യോഗേഷ് ഉള്‍പ്പെടെ നാലുപേര്‍ പിടിയിലാവാനുണ്ടെന്നു പൊലിസ് പറഞ്ഞു.