കൂത്തുപറമ്പ്: പാട്യം കോങ്ങാറ്റയില്‍ പൊട്ടിവീണ ഇലക്ട്രിക് ലൈനില്‍ തട്ടി വീട്ടമ്മ ഷോക്കേറ്റ് മരിച്ചു. ഇവരെ രക്ഷപ്പെടുത്താന്‍ ശ്രമിച്ച മകനും പരുക്കേറ്റു. കോങ്ങാറ്റ മിനി നിവാസില്‍ മലപ്പിലായി മുകുന്ദന്റെ ഭാര്യ പനയാട ലീല (60) ആണ് മരിച്ചത്. ഇന്നു രാവിലെ 6.10 ഓടെയാണ് സംഭവം. വീട്ടുപറമ്പിലെ മുരിക്ക് മരത്തിന്റെ കൊമ്പ് ഇലക്ടിക് ലൈനിന് മുകളില്‍ വീണതിനെ തുടര്‍ന്ന് ലൈന്‍ പൊട്ടി പറമ്പിലേക്ക് വീഴുകയായിരുന്നു. ഈ കാര്യം അറിയാതെ പറമ്പിലെ വാഴത്തോട്ടത്തിലേക്ക് ഇറങ്ങിയ ലീലയ്ക്ക് ഇലക്ട്രിക് ലൈനില്‍ തട്ടി ഷോക്കേല്‍ക്കുകയായിരുന്നു. ഇവരുടെ നിലവിളി കേട്ട് ഓടിയെത്തിയ മകന്‍ മിനീഷ് (39) ലീലയെ പിടിച്ച് മാറ്റി രക്ഷപ്പെടുത്താന്‍ ശ്രമിച്ചെങ്കിലും മിനീഷിനും ഷോക്കേറ്റു.ഉടന്‍ സ്ഥലത്തേക്ക് ഒടിയെത്തിയ ലീലയുടെ ഭര്‍ത്താവ് മരവടിയെടുത്ത് മിനീഷിന്റെ ദേഹത്ത് അടിച്ചാണ് വൈദ്യുതി ബന്ധം വേര്‍പെടുത്തിയത്. ഷോക്കേറ്റ് ഇരു ചുമലുകള്‍ക്കും പരുക്കേറ്റ മിനീഷിന് കൂത്തുപറമ്പ് താലൂക്കാശുപത്രിയില്‍ ചികിത്സ നല്‍കി. തത്സമയം ഈ വഴി കടന്നുപോയ ബൈക്ക് യാത്രികനാണ് പൊട്ടിയ ലൈനിലേക്ക് പ്രവഹിച്ചു കൊണ്ടിരിക്കുകയായിരുന്ന വൈദ്യുതി ബന്ധം വിച്ഛേദിച്ചത്.
വിവരമറിഞ്ഞ് കെ.എസ്.ഇ.ബി കൂത്തുപറമ്പ് സബ്ഡിവിഷണല്‍ അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ സി.മഹിജ, തലശേരി അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ ശ്രീലകുമാരി, പാട്യം അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ ബി.ഷിബു തുടങ്ങിയവര്‍ സംഭവസ്ഥലം സന്ദര്‍ശിച്ചു. അതേ സമയം,ലീല ഷോക്കേറ്റ് മരിക്കാനിടയായ സംഭവത്തില്‍ വൈദ്യുത വകുപ്പിന്റെ അനാസ്ഥയുണ്ടെന്ന് ലീലയുടെ ബന്ധുക്കളും നാട്ടുകാരും ആരോപിച്ചു.ഏറെ നാളായി പൊട്ടി തൂങ്ങിക്കിടക്കുകയായിരുന്ന മുരിക്ക് മരത്തിന്റെ കൊമ്പാണ് വൈദ്യുതി ലൈനിന്റെ മുകളിലേക്ക് പൊട്ടിവീണതെന്നും അപകടസാധ്യത കണക്കിലെടുത്ത് ഈ കൊമ്പ് മുറിച്ച് മാറ്റണമെന്ന് നേരത്തെ വൈദ്യുത വകുപ്പധികൃതരോട് ആവശ്യപ്പെട്ടിരുന്നുവെങ്കിലും അവര്‍ യാതൊരു നടപടിയും സ്വീകരിച്ചിരുന്നില്ലെന്നുമാണ് ഇവരുടെ ആരോപണം.

പിക്കപ്പ് വാന്‍ ഡ്രൈവറാണ് മിനീഷ്. മിനിത ലീലയുടെ മകളാണ്. മരുമക്കള്‍: ലിമ, പ്രഭാകരന്‍ (വ്യാപാരി,ചെന്നൈ) സഹോദരങ്ങള്‍: ജനാര്‍ദ്ദനന്‍, വിജയലക്ഷ്മി, ശകുന്തള.പരേതരായ കൃഷ്ണന്‍ ദേവി ദമ്പതികളുടെ മകളാണ് മരിച്ച ലീല.സംസ്‌ക്കാരം നാളെ (വ്യാഴം)രാവിലെ 9ന് വീട്ടുവളപ്പില്‍.