തിരുവനന്തപുരം: ലോകഹൃദയ ദിനത്തില്‍ നാവികന്റെ ഹൃദയം ഇനി മലയാളിയില്‍ തുടിക്കും. കൊച്ചി ഐ.എന്‍.എസ് ദ്രോണാചാര്യയിലെ സബ് ലെഫ്റ്റനന്റായ അതുല്‍ കുമാര്‍ പവാറിന്റെ (24) ഹൃദയമാണ് തൃപ്പൂണിത്തുറ സ്വദേശി സുബ്രഹ്മണ്യ ഭട്ടില്‍ (50) തുടിക്കുക. മസ്തിഷ്‌ക മരണത്തെ തുടര്‍ന്ന് അതുല്‍ കുമാറിന്റെ ഹൃദയം, കരള്‍, വൃക്ക എന്നിവയാണ് ദാനം ചെയ്തത്.
ഹരിയാന, പഞ്ച്കുല സ്വദേശി രാജ്ബിര്‍ സിങ് പവാറിന്റെ മകനാണ് അതുല്‍ കുമാര്‍ പവാര്‍. സുഹൃത്തുക്കളോടൊപ്പം വയനാട്ടിലേക്ക് വിനോദയാത്ര പോയി മടങ്ങവെ ചാലക്കുടിയില്‍ വച്ച് ഇവര്‍ സഞ്ചരിച്ചിരുന്ന വാഹനം ഡിവൈഡറില്‍ തട്ടി മറിയുകയായിരുന്നു. ഗുരുതരമായി പരുക്കേറ്റ അതുല്‍ കുമാറിനെ ചാലക്കുടിയിലുള്ള സ്വകാര്യ ആശുപത്രിയില്‍ പ്രവേശിപ്പിച്ചു. പിന്നീട് വിദഗ്ധ ചികിത്സ നല്‍കിയെങ്കിലും 27ന് മസ്തിഷ്‌ക മരണം സംഭവിക്കുകയായിരുന്നു. തുടര്‍ന്ന് ബന്ധുക്കള്‍ അവയവ ദാനത്തിന് സന്നദ്ധത അറിയിക്കുകയായിരുന്നു.
സ്വന്തം മകന്റെ അവയവങ്ങള്‍ സൈനിക സേവനം ചെയ്യുന്ന ഏതെങ്കിലും രോഗികള്‍ക്ക് നല്‍കണമെന്നായിരുന്നു രാജ്ബിര്‍ സിങ്ങിന്റെ ആഗ്രഹം. തുടര്‍ന്ന് നാവിക സേന ഉദ്യോഗസ്ഥര്‍ കേന്ദ്ര സര്‍ക്കാരിന്റെ മരണാനന്തര അവയവദാന പദ്ധതിയായ നാഷണല്‍ ഓര്‍ഗണ്‍ ആന്‍ഡ് ടിഷ്യൂ ട്രാന്‍സ്പ്ലാന്റ് ഓര്‍ഗനൈസേഷനുമായി ബന്ധപ്പെട്ടു. അവര്‍ കേരള സര്‍ക്കാരുമായി ബന്ധപ്പെടുകയും ആരോഗ്യ വകുപ്പ് മന്ത്രി കെ.കെ ശൈലജ വേണ്ട നിര്‍ദേശങ്ങള്‍ നല്‍കുകയുമായിരുന്നു.
ആശങ്കകള്‍ക്കും സംശയങ്ങള്‍ക്കും ഇടനല്‍കാതെ മസ്തിഷ്‌ക മരണം സ്ഥിരീകരിക്കണമെന്ന കര്‍ശന നിര്‍ദേശത്തെ തുടര്‍ന്ന് എല്ലാ അന്താരാഷ്ട്ര മാനദണ്ഡങ്ങളും അനുസരിച്ചാണ് മസ്തിഷ്‌ക മരണം സ്ഥിരീകരിച്ചത്. ഹൃദയം, കരള്‍, 2 വൃക്കകള്‍ എന്നിവ പ്രവര്‍ത്തനക്ഷമമായതിനാല്‍ ഡല്‍ഹിയിലെ നാവിക ആശുപത്രിയില്‍ ചികിത്സയിലുള്ളയാള്‍ക്ക് നോട്ടോ വഴി കരള്‍ നല്‍കാനുള്ള ശ്രമങ്ങളാരംഭിച്ചു. എന്നാല്‍ സാങ്കേതിക കാരണങ്ങള്‍ കൊണ്ട് അവര്‍ക്കെത്താനായില്ല. തുടര്‍ന്ന് ബംഗളൂരുവിലെ നാവിക ആശുപത്രിയിലെ രോഗിക്ക് ഒരു വൃക്ക നല്‍കാന്‍ തീരുമാനമാവുകയായിരുന്നു. ബാക്കി അവയവങ്ങള്‍ മൃതസഞ്ജീവനിയില്‍ രജിസ്റ്റര്‍ ചെയ്ത് കാത്തിരിക്കുന്ന അനുയോജ്യരായ രോഗികള്‍ക്ക് മുന്‍ഗണനാ ക്രമത്തില്‍ നല്‍കാന്‍ തീരുമാനമായി.