ന്യൂഡല്‍ഹി: കഴിഞ്ഞ ദിവസം കശ്മിരില്‍ ബി.എസ്. എഫ് കേന്ദ്രത്തിനു നേരെ ഭീകരര്‍ നടത്തിയ ആക്രമണം യഥാര്‍ഥത്തില്‍ ലക്ഷ്യം വച്ചിരുന്നത് ശ്രീനഗര്‍ വിമാനത്താവളത്തെയായിരുന്നുവെന്ന് റിപ്പോര്‍ട്ട്.
ജെയ്‌ഷെ മുഹമ്മദ് ഭീകര സംഘടനയിലെ അഫ്‌സല്‍ ഗുരു സ്‌ക്വാഡ് അംഗങ്ങളാണ് ബി.എസ്.എഫ് കേന്ദ്രത്തിനു നേരെ ആക്രമണം നടത്തിയിരുന്നത്. എന്നാല്‍ ഈ കേന്ദ്രത്തിന് തൊട്ടടുത്തുള്ള വിമാനത്താവളമായിരുന്നു ഭീകരര്‍ ലക്ഷ്യം വച്ചിരുന്നതെന്ന് രഹസ്യാന്വേഷണ വിഭാഗം നല്‍കുന്ന വിവരം.
കശ്മിരില്‍ കനത്ത സുരക്ഷയുള്ള ഒരു മേഖലയിലാണ് വിമാനത്താവളം സ്ഥിതി ചെയ്യുന്നത്. വിമാനത്താവളം ആക്രമിച്ച് അന്താരാഷ്ട്ര തലത്തില്‍ ശ്രദ്ധകേന്ദ്രീകരിക്കുകയായിരുന്നു ഭീകരരുടെ ലക്ഷ്യം.
ആക്രമണത്തില്‍ ഒരു ബി.എസ്.എഫ് ജവാന്‍ വീരമൃത്യുവരിക്കുകയും മറ്റ് മൂന്നുപേര്‍ക്ക് പരുക്കേല്‍ക്കുകയും ചെയ്തിരുന്നു. ആക്രമണം നടത്തിയ മൂന്ന് ഭീകരരേയും ഏറ്റുമുട്ടലില്‍ സൈന്യം വധിച്ചിരുന്നു.