തൃശൂര്‍: കേരള സാഹിത്യ അക്കാദമി സെക്രട്ടറിയായി ഡോ.കെ.പി മോഹനന്‍ ഓഗസ്റ്റ് 17 ന് ഉച്ചയ്ക്ക് 12 മണിക്ക് ഓഫിസിലെത്തി ചുമതലയേല്‍ക്കും. അക്കാദമി പ്രസിഡന്റ് വൈശാഖന്‍ തദവസരത്തില്‍ സന്നിഹിതനാകും. മലയാളികളുടെ പ്രിയപ്പെട്ട എഴുത്തുകാരന്‍ ചെറുകാടിന്റെ മകനായ കെ.പി മോഹനന്‍ സാഹിത്യവിമര്‍ശകനും പ്രഭാഷകനുമാണ്. മാഹി, കാരക്കല്‍ ഗവ. കോനളജുകളുടെ പ്രിന്‍സിപ്പല്‍ ആയിരുന്നു. കാലിക്കറ്റ് സര്‍വകലാശാല കോളജ് വികസന കൗണ്‍സില്‍ ഡയറക്ടര്‍, കാലടി ശ്രീശങ്കരാചാര്യ സര്‍വകലാശാല സിന്‍ഡിക്കേറ്റ് അംഗം എന്നീ നിലകളില്‍ പ്രവര്‍ത്തിച്ചു. കേരള സാഹിത്യ അക്കാദമിയിലും കലാമണ്ഡലത്തിലും ജനറല്‍ കൗണ്‍സില്‍ അംഗമായിരുന്നു. ദേശാഭിമാനി വാരിക പത്രാധിപന്‍ എന്ന നിലയില്‍ പ്രവര്‍ത്തിച്ചുവരുന്നു.