തിരുവനന്തപുരം: സംസ്ഥാനത്ത് മെഡിക്കല്‍ വിദ്യാഭ്യാസ വകുപ്പിന് കീഴില്‍ പ്രവര്‍ത്തിക്കുന്ന വിവിധ മെഡിക്കല്‍ കോളജുകളുടെ നവീകരണത്തിനായി 34.31 കോടിയുടെ ഭരണാനുമതി.
തിരുവനന്തപുരം മെഡിക്കല്‍ കോളജിലെ വിവിധ വാര്‍ഡുകളുടെ നവീകരണത്തിനും റേഡിയോളജി, ബയോകെമിസ്ട്രി, റേഡിയോതെറാപ്പി, കാര്‍ഡിയോളജി, ഓര്‍ത്തോപീഡിക്‌സ്, ഇ.എന്‍.ടി, ഗ്യാസ്‌ട്രോ സര്‍ജറി തുടങ്ങി വിവിധ ഡിപാര്‍ട്ട്‌മെന്റുകളില്‍ ഉപകരണങ്ങള്‍ വാങ്ങുന്നതിനും ജീവന്‍രക്ഷാ ഉപകരണങ്ങളുടെ കേടുപാടുകള്‍ തീര്‍ത്ത് പ്രവര്‍ത്തന യോഗ്യമാക്കുന്നതിനും 17 കോടിയുടെ ഭരണാനുമതിയാണ് നല്‍കിയത്. ആലപ്പുഴ മെഡിക്കല്‍ കോളജില്‍ ഫാര്‍മസി കെട്ടിടത്തിന്റെ നവീകരണം, മെഡിക്കല്‍ ഉപകരണങ്ങളുടെ കേടുപാട് തീര്‍ക്കല്‍,സര്‍ജറി യൂനിറ്റിന്റെ നവീകരണം തുടങ്ങിയ പ്രവര്‍ത്തനങ്ങള്‍ക്കായി 3.30 കോടി രൂപയും കോട്ടയം മെഡിക്കല്‍ കോളജിലെ കാന്‍സര്‍ കെയര്‍ സെന്റര്‍ വാര്‍ഡിന്റെ നവീകരണത്തിനായും വിവിധ വാര്‍ഡുകളിലേക്കുള്ള സെന്‍ട്രല്‍ ഓക്‌സിജന്‍ സപ്ലൈയുടെ പ്രവര്‍ത്തനങ്ങള്‍ മെച്ചപ്പെടുത്തുന്നതിനുമായി 5.09 കോടിയുടെ ഭരണാനുമതിയും ലഭിച്ചിട്ടുണ്ട്.
തൃശൂര്‍ മെഡിക്കല്‍ കോളജിന്റെ ടെലി മെഡിസിന്‍ യൂനിറ്റ്, വിവിധ വാര്‍ഡുകളുടെ നവീകരണം, ജലവിതരണം, വൈദ്യുതി, ജനറേറ്ററുകള്‍ തുടങ്ങിയവയുടെ വിപുലീകരണം, ഫാര്‍മസി, വിവിധ മെഡിക്കല്‍ ഉപകരണങ്ങള്‍ തുടങ്ങിയവയുടെ അറ്റകുറ്റപ്പണികള്‍തീര്‍ത്ത് പ്രവര്‍ത്തനയോഗ്യമാക്കുന്നതിനായി 3.50 കോടി രൂപയും കോഴിക്കോട് മെഡിക്കല്‍ കോളജിലെ വിവിധ യൂനിറ്റുകളുടെ നവീകരണത്തിനായി 5.50 കോടിയും നല്‍കി.