മോസ്‌കോ: റഷ്യയില്‍ ട്രെയിനും ബസും കൂട്ടിയിടിച്ച് 19 പേര്‍ മരിച്ചു. പ്രാദേശിക സമയം ഇന്നലെ വൈകിട്ട് കിഴക്കന്‍ മോസ്‌കോയിലാണു സംഭവം. മോസ്‌കോയില്‍നിന്ന് 110 കി.മീറ്റര്‍ അകലെയുള്ള പോക്രോവ് നഗരത്തിനടുത്ത് ലെവല്‍ക്രോസ് മുറിച്ചുകടക്കാനുള്ള ശ്രമത്തിനിടെ പാസഞ്ചര്‍ ബസിനു നേരെ ഇതുവഴി വന്ന ട്രെയിന്‍ കൂട്ടിയിടിക്കുകയായിരുന്നു. ബസ് പൂര്‍ണമായും തകര്‍ന്നിട്ടുണ്ട്. മരിച്ചവര്‍ എല്ലവരും ബസിലുള്ളവരാണ്. ഇതില്‍ കുട്ടികളും ഉള്‍പ്പെടും.
നിരവധിപേര്‍ക്കു പരുക്കേല്‍ക്കുകയും ചെയ്തിട്ടുണ്ട്. അപകടസമയത്ത് 55 ഉസ്‌ബെകിസ്താന്‍ പൗരന്മാര്‍ ബസിലുണ്ടായിരുന്നതായി അധികൃതര്‍ പറഞ്ഞു. പ്രാദേശിക ആരോഗ്യ സമിതിയാണു മരണസംഖ്യ അറിയിച്ചത്. അതേസമയം റഷ്യന്‍ അധികൃതര്‍ ഇക്കാര്യം നിഷേധിച്ചു.