കൊണ്ടോട്ടി: കരിപ്പൂര്‍ വിമാനത്താവളത്തില്‍ സര്‍വിസ് നടത്തുന്നതിനുള്ള ഗ്രൗണ്ട് ചാര്‍ജ് ഇനത്തില്‍ എയര്‍പോര്‍ട്ട് അതോറിറ്റിക്ക് എയര്‍ ഇന്ത്യ നല്‍കാനുള്ളത് ലക്ഷങ്ങള്‍.
രണ്ടു കോടിയോളം രൂപ നല്‍കാനുണ്ടായിരുന്നെങ്കിലും അതോറിറ്റി നിലപാട് കടുപ്പിച്ചതോടെ കുറച്ച് പണം അടച്ചെങ്കിലും ഇപ്പോഴും ലക്ഷങ്ങളുടെ കുടിശ്ശികയുണ്ട്. ഗള്‍ഫ്, ആഭ്യന്തര സെക്ടറുകളില്‍ നിന്നായി വിമാനങ്ങള്‍ കരിപ്പൂരില്‍ വന്നിറങ്ങിയതിനുള്ള നിരക്കാണിത്.
കരിപ്പൂരില്‍ സര്‍വിസ് നടത്തുന്ന മറ്റു വിമാനക്കമ്പനികളെല്ലാം മാസാന്ത്യത്തില്‍തന്നെ ഗ്രൗണ്ട് ചാര്‍ജ് നല്‍കുമ്പോഴാണ് എയര്‍ ഇന്ത്യ കുടിശ്ശിക വരുത്തുന്നത്. മാസത്തില്‍ ഏഴു മുതല്‍ 10 ലക്ഷം വരെയാണ് എയര്‍ ഇന്ത്യ കുടിശ്ശിക വരുത്തുന്നത്.
ഓരോ വിമാനങ്ങളുടേയും ഭാരത്തിന് അനുസരിച്ചാണ് എയര്‍പോര്‍ട്ട് അതോറിറ്റി ഫീസ് ഈടാക്കുന്നത്.
വിമാനക്കമ്പനിയുടെ കുടിശ്ശികമൂലം എയര്‍പോര്‍ട്ട് അതോറിറ്റിയുടെ വരുമാനത്തിലും ഇടിവേല്‍ക്കുന്നുണ്ട്. കരിപ്പൂരില്‍ വലിയ വിമാനങ്ങള്‍ പിന്‍വലിച്ചതുമുതല്‍ അതോറിറ്റിയുടെ വരുമാനം കുറഞ്ഞിരുന്നു. ഇതിനുപുറമെയാണ് ലക്ഷങ്ങളുടെ കുടിശ്ശിക എയര്‍ ഇന്ത്യയില്‍ നിന്ന് പിരിഞ്ഞുകിട്ടാനുള്ളത്.
എയര്‍ ഇന്ത്യയുടെ ഏറ്റവും കൂടുതല്‍ വിമാനങ്ങള്‍ സര്‍വിസ് നടത്തുന്ന മേഖല കൂടിയാണ് കരിപ്പൂര്‍. വിമാനങ്ങളുടെ ലാന്റിങ് ചാര്‍ജ് ഉപയോഗിച്ചാണ് അതോറിറ്റി വിമാനത്താവള വികസനങ്ങളും മറ്റും നടത്തുന്നത്.