പൊഴുതന: ടീം ഡോസോ സേട്ടുകുന്നും സ്മാര്‍ട്ട് വിങ് കാലിക്കറ്റും ഓള്‍ ഇന്ത്യാ മലയാളി അസോസിയേഷനും ജില്ലാ ടൂറിസം പ്രൊമോഷന്‍ കൗണ്‍സിലും സംയുക്തമായി മുംബൈയില്‍നിന്ന് എത്തുന്ന ദൈവത്തിന്റെ സ്വന്തം പൂമ്പാറ്റകള്‍ക്ക് ഇന്ന് ജനകീയ സ്വീകരണം നല്‍കും.
മുംബൈ മഹാനഗരത്തിന്റെ തെരുവുകളില്‍ ഉപേക്ഷിക്കപ്പെട്ട് മനുഷ്യ സ്‌നേഹികള്‍ പോറ്റിവളര്‍ത്തിയ 30 കുട്ടികള്‍ക്കാണ് പൊഴുതന സേട്ടുകിന്നില്‍ സ്വീകരണം സംഘടിപ്പിക്കുന്നത്. മുബൈ പൊലിസിന്റെ നേതൃത്വത്തില്‍ മുംബൈ റെയില്‍ ഫൗണ്ടേഷന്‍ പ്രവര്‍ത്തകര്‍ സംരക്ഷിക്കുന്ന കുട്ടികള്‍ പഠന കലാരംഗങ്ങളില്‍ ഏറെ മികവ് പുലത്തുന്നവരാണ്. ഇന്ന് വൈകിട്ട് അഞ്ചിന് വിശിഷ്ടാതിഥികള്‍ക്ക് സ്വീകരണം നല്‍കും. നാളെ വൈകിട്ട് അഞ്ചിന് ജില്ലാ കലക്ടര്‍ എസ്. സുഹാസ് ഐ.എ.എസ് ദൈവത്തിന്റെ സ്വന്തം പൂമ്പാറ്റകള്‍ക്ക് സ്വീകരിക്കും.
വൈകിട്ട് ആറിന് നടക്കുന്ന സാംസ്‌കാരിക സമ്മേളനം സി.കെ ശശീന്ദ്രന്‍ എം.എല്‍.എ ഉദ്ഘാടനം ചെയ്യും.
പൊഴുതന പഞ്ചായത്ത് പ്രസിഡന്റ് എന്‍.സി പ്രസാദ് അധ്യക്ഷനാവും. സ്വാഗതസംഘം ചെയര്‍മാന്‍ ബിജു ജോയ് സ്വാഗതവും പ്രോഗ്രാം കമ്മിറ്റി കണ്‍വീനര്‍ എം. ജോര്‍ജ്ജ് നന്ദിയും പറയും.