തിരുവനന്തപുരം: കേന്ദ്ര-സംസ്ഥാന സര്‍ക്കാരുകളുടെ ജനദ്രോഹനയങ്ങള്‍ക്കെതിരേ യു.ഡി.എഫ് നടത്തുന്ന പടയൊരുക്കം ജാഥയുടെ ഒരുക്കങ്ങള്‍ പൂര്‍ത്തിയായതായി പ്രതിപക്ഷ നേതാവ് രമേശ് ചെന്നിത്തല. നവംബര്‍ ഒന്നിന് വൈകിട്ട് മൂന്നിന് കാസര്‍കോട് ജില്ലയിലെ കുമ്പളയില്‍ എ.കെ ആന്റണി ജാഥ ഉദ്ഘാടനം ചെയ്യും. കെ.പി.സി.സി പ്രസിഡന്റ് എം.എം ഹസന്‍ അധ്യക്ഷനാകും.
ഉമ്മന്‍ചാണ്ടി, പി.കെ കുഞ്ഞാലിക്കുട്ടി, എ.ഐ.സി.സി ജന. സെക്രട്ടറിമാരായ മുകുള്‍ വാസ്‌നിക്, കെ.സി വേണുഗോപാല്‍, കര്‍ണാടക മന്ത്രിമാരായ യു.ടി ഖാദര്‍, രാമാനന്ദറായ് പങ്കെടുക്കും. ഇതിന് മുന്നോടിയായി ഒക്ടോബര്‍ 31ന് കെ.പി.സി.സി കലാസാംസ്‌കാരിക വേദിയുടെ ആഭിമുഖ്യത്തില്‍ ഫാസിസത്തിനെതിരേ ആര്യാടന്‍ ഷൗക്കത്ത് നയിക്കുന്ന കലാജാഥ ഉപ്പളയില്‍ ശബ്‌നം ഹാശ്മി ഉദ്ഘാടനം ചെയ്യും.
നവംബര്‍ എട്ടിന് കോഴിക്കോട് കടപ്പുറത്ത് നടക്കുന്ന മേഖലാ റാലി പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും.
പി. ചിദംബരം, ശരദ് യാദവ് തുടങ്ങിയ നേതാക്കള്‍ പങ്കെടുക്കും. അന്നേദിവസം നോട്ട് പിന്‍വലിക്കലിന്റെ ഒന്നാം വാര്‍ഷികം യു.ഡി.എഫ് കരിദിനമായി ആചരിക്കും. 18ന് കൊച്ചി രാജേന്ദ്ര മൈതാനിയില്‍ നടക്കുന്ന റാലി മുന്‍ പ്രധാനമന്ത്രി മന്‍മോഹന്‍ സിങ് ഉദ്ഘാടനം ചെയ്യും.
ഡിസംബര്‍ ഒന്നിന് പടയൊരുക്കത്തിന്റെ സമാപനത്തോടനുബന്ധിച്ച് തിരുവനന്തപുരത്ത് ലക്ഷങ്ങള്‍ അണിനിരക്കുന്ന റാലി സംഘടിപ്പിക്കും. സമാപന സമ്മേളനം കോണ്‍ഗ്രസ് ദേശീയ ഉപാധ്യക്ഷന്‍ രാഹുല്‍ഗാന്ധി ഉദ്ഘാടനം ചെയ്യും. ഗുലാം നബി ആസാദ്, പി. ചിദംബരം പങ്കെടുക്കും. ജാഥയ്ക്കിടയില്‍ കേന്ദ്ര സര്‍ക്കാരിന്റെ ജനദ്രോഹ നയങ്ങള്‍ക്കെതിരേ ഒരു കോടി ഒപ്പു ശേഖരിക്കുമെന്നും ചെന്നിത്തല പറഞ്ഞു.