ബ്രിസ്‌ബെയ്ന്‍: ഹീന സിദ്ദുവിന്റെ സുവര്‍ണ നേട്ടത്തിന് പിന്നാലെ കോമണ്‍വെല്‍ത്ത് ഷൂട്ടിങ് ചാംപ്യന്‍ഷിപ്പില്‍ ഇന്ത്യന്‍ താരങ്ങള്‍ മെഡല്‍ വേട്ട തുടരുന്നു. പുരുഷന്‍മാരുടെ പത്ത് മീറ്റര്‍ എയര്‍ പിസ്റ്റള്‍ വിഭാഗത്തില്‍ സ്വര്‍ണം, വെള്ളി, വെങ്കലം മെഡലുകള്‍ തൂത്തുവാരി ഇന്ത്യന്‍ പുരുഷ താരങ്ങളുടെ മികച്ച പ്രകടനം.
ഷഹ്‌സര്‍ റിസ്‌വി സ്വര്‍ണവും ഓംകാര്‍ സിങ് വെള്ളിയും ജിത്തു റായ് വെങ്കലവും സ്വന്തമാക്കി. പത്ത് മീറ്റര്‍ എയര്‍ റൈഫിള്‍ വനിതാ പോരാട്ടത്തില്‍ പൂജ ഘാട്കറും ഇന്ത്യക്കായി സ്വര്‍ണം വെടിവച്ചിട്ടു. ഇതേ ഇനത്തില്‍ വെള്ളിയും ഇന്ത്യന്‍ താരത്തിന് തന്നെ. അഞ്ജും മൗഡ്ഗിലാണ് വെള്ളി നേടിയത്. പൂജ 249.8 പോയിന്റും അഞ്ജും 248.7 പോയിന്റും സ്വന്തമാക്കി. കഴിഞ്ഞ ദിവസം വനിതകളുടെ പത്ത് മീറ്റര്‍ എയര്‍ പിസ്റ്റള്‍ വിഭാഗത്തിലാണ് ഹീന സിദ്ദു സുവര്‍ണ താരമായത്.