തിരുവനന്തപുരം: എല്ലാ പി.എസ്.സി പരീക്ഷകള്‍ക്കും മലയാളത്തില്‍ കൂടി ചോദ്യപേപ്പര്‍ നല്‍കണമെന്ന് പി.എസ്.സിയോട് ആവശ്യപ്പെടാന്‍ ഔദ്യോഗിക ഭാഷ ഉന്നതതല സമിതി യോഗം തീരുമാനിച്ചു. ഇപ്പോള്‍ എസ്.എസ്.എല്‍.സി വരെ യോഗ്യതയുള്ള പരീക്ഷകള്‍ക്കാണ് മലയാളത്തില്‍ ചോദ്യങ്ങള്‍ നല്‍കുന്നത്. ബിരുദം യോഗ്യതയായ പരീക്ഷകളില്‍ ചോദ്യപേപ്പര്‍ ഇംഗ്ലീഷിലാണ് തയാറാക്കാറുള്ളത്. അത്തരം പരീക്ഷകള്‍ക്കും മലയാളത്തില്‍ ചോദ്യം നല്‍കണമെന്ന് പി.എസ്.സിയോട് ആവശ്യപ്പെട്ടു. നിലവില്‍ 10 ശതമാനം മാര്‍ക്കിന്റെ ചോദ്യങ്ങളാണ് മലയാള ഭാഷാവിഭാഗത്തില്‍ പി.എസ്.സി ഉള്‍പ്പെടുത്തിയിട്ടുള്ളത്.
ഒന്നിലേറെ പരീക്ഷയുള്ള ഉദ്യോഗങ്ങള്‍ക്ക് ഒരു പേപ്പര്‍ നിര്‍ബന്ധമായും മലയാളഭാഷ സംബന്ധിച്ചാവണമെന്ന് പി.എസ്.സിയോട് ശുപാര്‍ശ ചെയ്യും. പ്ലസ് ടു ക്ലാസുകളില്‍ ശാസ്ത്ര വിഷയങ്ങള്‍ക്ക് മലയാളത്തില്‍ പാഠപുസ്തകങ്ങള്‍ തയാറാക്കാന്‍ എസ്.ഇ.ആര്‍.ടിയോട് നിര്‍ദേശിക്കും. എല്ലാ സര്‍ക്കാര്‍ വെബ് സൈറ്റുകളും മലയാളത്തില്‍ കൂടി വേണമെന്നും യോഗം തീരുമാനിച്ചു.