തൃക്കൂര്‍: രക്തം കട്ടപിടിക്കാതെ ശരീരത്തിലെ മുറിവുകളിലൂടെ രക്തംവാര്‍ന്നു പോകുന്ന ഹീമോഫീലിയ രോഗം ബാധിച്ച ഏഴു വയസുകാരിക്ക് കല്ലൂരിലെ യുവാക്കളുടെ കൈതാങ്ങ്. കോടങ്കണ്ടത്ത് ജിന്റോയുടെയും സുമിയുടെയും മകളായ ക്രിസ്റ്റീന (7) ക്ക് കല്ലൂര്‍ സൗഹൃദ യുവസംഗമം പ്രവര്‍ത്തകരാണ് സാമ്പത്തിക സഹായവുമായെത്തിയത്. രണ്ട് മാസം മുന്‍പാണ് കുട്ടിക്ക് രോഗലക്ഷണം കണ്ടത്.
വെല്ലൂര്‍ സി.എം.സി ആസ്പത്രിയിലാണ് ഇതിന് ഫലപ്രദമായ ചികിത്സയുള്ളത്. കുട്ടിയുടെ പിതാവ് ജിന്റോക്കും ഇതേ രോഗലക്ഷണങ്ങള്‍ കാണുന്നുണ്ട്. കുട്ടിയുടെയും പിതാവിന്റെയും രക്ത പരിശോധനക്ക് വലിയ ചെലവ് വരുന്നുണ്ട്.
വാടക വീട്ടില്‍ താമസിക്കുന്ന കുടുംബം നിത്യവൃത്തിക്കു കഷ്ടപ്പെടുകയാണ്. കുട്ടിയുടെ ചികിത്സ ആരംഭിക്കുന്നതിന് തുക കണ്ടെത്താന്‍ ബുദ്ധിമുട്ടിയ കുടംബത്തിന് പ്രാഥമിക പരിശോധനയ്ക്കുള്ള തുക സൗഹൃദ യുവസംഗമം പ്രവര്‍ത്തകര്‍ നല്‍കി.
ബ്ലോക്ക് പഞ്ചായത്തംഗം പ്രീബനന്‍ ചുണ്ടേലപ്പറമ്പില്‍, പഞ്ചായത്തംഗങ്ങളായ സന്ദീപ് കണിയത്ത്, സൈമണ്‍ നമ്പാടന്‍ നേതൃത്വം നല്‍കി.
തുടര്‍ചികിത്സക്ക് സുമനസ്സുകള്‍ സഹായിക്കുമെന്ന പ്രതീക്ഷയിലാണ് ഈ കുടുംബം.