മട്ടാഞ്ചേരി: സ്വകാര്യ കരാറുകരനായ കൊച്ചി പാണ്ടിക്കുടി സ്വദേശി കണ്ടത്തിപ്പറമ്പില്‍ ജോസഫിന് നോട്ട് നിരോധനം മൂലം തന്റെ ജീവിതോപാധിയാണ് നഷ്ടപ്പെട്ടത്. എട്ട് സൈറ്റുകളില്‍ നിര്‍മാണജോലികള്‍ നടക്കുന്നതിനിടയിലാണ് ഇടിത്തീപോലെ നോട്ട് നിരോധനം വന്നതെന്ന് ജോസഫ് ഓര്‍ക്കുന്നു. അപ്രതീക്ഷിതമായി വന്ന നിരോധനം മൂലം വര്‍ക്കുകള്‍ സ്തംഭിച്ചതായും ഒടുവില്‍ എട്ടിടത്തേയും കരാറുകള്‍ നഷ്ടപ്പെട്ടതായും ജോസഫ് ഉള്ള്‌വിങ്ങി പറഞ്ഞു. ലക്ഷങ്ങളാണ് നഷ്ടപ്പെട്ടത്. 

കരാറുകാരനായതിനാല്‍ കൂലിപ്പണിക്ക് പോകാന്‍ പോലും കഴിയാത്ത അവസ്ഥയിലായി. തന്റെ കീഴിലുണ്ടായ നാല്‍പ്പതോളം തൊഴിലാളികള്‍ക്ക് തൊഴില്‍ നഷ്ടമായി. ഒരാഴ്ച ദിവസേന 500 രൂപ നല്‍കി തൊഴിലാളികളെ നിലനിര്‍ത്തിയെങ്കിലും നിവര്‍ത്തിയില്ലാതെ വന്നപ്പോള്‍ പറഞ്ഞയച്ചു. വായ്പ തിരിച്ചടവ് മുടങ്ങിയതോടെ വീട് ജപ്തിഭീഷണിയിലാണ്. വെള്ളക്കരം പോലും അടക്കാന്‍ കഴിയാത്ത രീതിയില്‍ നോട്ടുനിരോധനം തകര്‍ത്ത് കളഞ്ഞെന്നും ഇതുപോലെ നിരവധി കുടുംബങ്ങള്‍ വഴിയാധാരമായിട്ടുണ്ടെന്നും ജോസഫ് പറയുന്നു.