ദോഹ: ഗള്‍ഫ് പ്രതിസന്ധിയുടെ സാഹചര്യത്തില്‍ തുര്‍ക്കി പ്രസിഡന്റ് റജബ് തയ്യിബ് ഉര്‍ദുഗാന്‍ നവംബര്‍ പതിനഞ്ചിന് ഖത്തറില്‍ സന്ദര്‍ശനം നടത്തും. പ്രതിസന്ധിയില്‍ ഖത്തറിന് ശക്തമായ പിന്തുണ നല്‍കുന്ന രാജ്യമാണ് തുര്‍ക്കി. സഊദി സഖ്യരാജ്യങ്ങളുടെ ഉപരോധത്തിനുശേഷം ഖത്തറിനും തുര്‍ക്കിയ്ക്കുമിടയില്‍ വാണിജ്യവ്യാപാര ഇടപാടുകളില്‍ വലിയ തോതിലുള്ള വര്‍ധനവുണ്ടായിട്ടുണ്ട്.

രണ്ടു രാജ്യങ്ങള്‍ക്കുമിടയില്‍ സംയുക്ത സൈനിക പരിശീലനവും നടക്കുന്നുണ്ട്. അങ്കാറയുടെ ഖത്തറിലെ സൈനിക ബേസില്‍ 3000 സൈനികരെ നിയോഗിക്കുമെന്ന് റിപ്പോര്‍ട്ടുണ്ടായിരുന്നു.

ദോഹയില്‍ നടക്കുന്ന ഖത്തര്‍ തുര്‍ക്കി സുപ്രിം സ്ട്രാറ്റജിക് കമ്മിറ്റിയുടെ മൂന്നാം സെഷന് ഉര്‍ദുഗാന്‍ അധ്യക്ഷത വഹിച്ചേക്കും. 2015 ഡിസംബറില്‍ ദോഹയിലായിരുന്നു സുപ്രീം സ്ട്രാറ്റജിക് കമ്മിറ്റിയുടെ ആദ്യ യോഗം ചേര്‍ന്നത്. രണ്ടാം യോഗം കഴിഞ്ഞ വര്‍ഷം ട്രാബ്‌സോണില്‍ നടന്നു. ഈ യോഗങ്ങളിലായി 30 കരാറുകള്‍ രൂപപ്പെട്ടു. ഈ വര്‍ഷത്തെ യോഗം കൂടി കഴിയുന്നതോടെ കരാറുകളുടെ എണ്ണം 40ആയി വര്‍ധിക്കും.

റഷ്യയിലും കുവൈത്തിലും ഉര്‍ദുഗാന്‍ സന്ദര്‍ശനം നടത്തുന്നുണ്ട്.