കോഴിക്കോട്: സമസ്ത സെക്രട്ടറിയും കേരള ഹജ്ജ് കമ്മിറ്റി ചെയര്‍മാനും സുപ്രഭാതം പത്രത്തിന്റെ സ്ഥാപകനുമായിരുന്ന പ്രമുഖ ഇസ്‌ലാമിക പണ്ഡിതന്‍ കോട്ടുമല ടി.എം ബാപ്പു മുസ്‌ലിയാരുടെ സമ്പൂര്‍ണ ജീവചരിത്ര ഗ്രന്ഥം പുറത്തിറങ്ങുന്നു.'ഒരാള്‍, ഒരുപാട് കാലങ്ങള്‍' എന്ന ഗ്രന്ഥം നാളെ രാവിലെ പത്തിന് കോഴിക്കോട് കെ.പി കേശവ മേനോന്‍ ഹാളില്‍ പാണക്കാട് സാദിഖലി ശിഹാബ് തങ്ങള്‍ പ്രകാശനം ചെയ്യും.
എസ്.വൈ.എസ് സംസ്ഥാന ട്രഷറര്‍ മെട്രോ മുഹമ്മദ് ഹാജി ഏറ്റുവാങ്ങും. സമസ്ത സെക്രട്ടറി എം.ടി അബ്ദുല്ല മുസ്‌ലിയാര്‍ അധ്യക്ഷനാകുന്ന ചടങ്ങ് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.
കടമേരി റഹ്മാനിയ്യ പൂര്‍വവിദ്യാര്‍ഥി കൂട്ടായ്മയായ റഹ്മാനീസ് അസോസിയേഷനാണ് പുസ്തകം പ്രസിദ്ധീകരിക്കുന്നത്.
സമസ്ത ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സ്വാദിഖ് മുസ്‌ലിയാര്‍, കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി, കൊയ്യോട് ഉമര്‍ മുസ്‌ലിയാര്‍, ചീക്കിലോട്ടു കുഞ്ഞബ്ദുല്ല മുസ്‌ലിയാര്‍, സത്താര്‍ പന്തലൂര്‍ തുടങ്ങിയവര്‍ ബാപ്പു മുസ്‌ലിയാരെ അനുസ്മരിക്കും. ഡോ. ശഫീഖ് വഴിപ്പാറ പുസ്തക പരിചയം നടത്തും.
പ്രതിപക്ഷ ഉപനേതാവ് ഡോ. എം.കെ മുനീര്‍, എം.കെ രാഘവന്‍ എം.പി, എ. പ്രദീപ് കുമാര്‍ എം.ല്‍.എ ചടങ്ങില്‍ വിശിഷ്ടാതിഥികളാവും. ഉമര്‍ ഫൈസി മുക്കം, എ.വി അബ്ദുറഹ്മാന്‍ മുസ്‌ലിയാര്‍, സി.എച്ച് മഹ്മൂദ് സഅദി,നാസര്‍ ഫൈസി കൂടത്തായി, മോയിന്‍ കുട്ടി മാസ്റ്റര്‍, നവാസ് പൂനൂര്‍, ഇബ്‌റാഹിം മുറിച്ചാണ്ടി, എസ്.പി.എം തങ്ങള്‍ പങ്കെടുക്കും.
തുടര്‍ന്ന്, ഉലമ ആക്ടിവിസത്തിന്റെ കേരളീയ പരിസരം എന്ന വിഷയത്തില്‍ സെമിനാര്‍ നടക്കും. അബ്ദുല്‍ ഹമീദ് ഫൈസി അമ്പലക്കടവ്, അബ്ദുസമദ് പൂക്കോട്ടൂര്‍, എ. സജീവന്‍, ഹംസ റഹ്മാനി കൊണ്ടിപറമ്പ്, ഫരീദ് റഹ്മാനി കാളികാവ് പങ്കെടുക്കും.