വാഗ: വെടിനിര്‍ത്തല്‍ കാര്‍ ലംഘിച്ച് ജമ്മുവിലെ പൂഞ്ചില്‍ വെടിയുതിര്‍ത്ത പാകിസ്താന്‍സൈന്യം വാഗയില്‍ ഇന്ത്യന്‍ പട്ടാളക്കാര്‍ക്ക് ലഡു വിതരണം ചെയ്തു. പാകിസ്താന്റെ സ്വാതന്ത്ര്യദിനാഘോഷത്തിന്റെ ഭാഗാമായാണ് വാഗാ അതിര്‍ത്തിയില്‍ ലഡു വിതരണം ചെയ്തത്. ഇന്നു രാവിലെയോടെയാണ് പൂഞ്ചില്‍ ഇന്ത്യന്‍ പോസ്റ്റുകള്‍ക്കു നേരെ വെടിവയ്പ്പുണ്ടായത്.

കഴിഞ്ഞവര്‍ഷവും പാക് സൈനികര്‍ മധുരം നല്‍കിയിരുന്നെങ്കിലും അന്ന് ബി.എസ്.എഫ് അതു സ്വീകരിച്ചിരുന്നില്ല. ഗുര്‍ദാസ്പൂരില്‍ നടന്ന തീവ്രവാദി ആക്രമണത്തെ തുടര്‍ന്നായിരുന്നു അത്.

ഇരുരാജ്യങ്ങളുടെയും സ്വാതന്ത്ര്യദിനാഘോഷങ്ങളുടെ ഭാഗമായി വാഗാ അതിര്‍ത്തിയില്‍ ജനത്തിരക്ക് കൂടിയതിനാല്‍ ഇവിടെ സൈനികരുടെ എണ്ണം വര്‍ധിപ്പിച്ചിട്ടുണ്ട്. പാക് താലിബാന്റെ ഭാഗത്തുനിന്ന് ചാവേര്‍ ആക്രമണം ഉണ്ടാവാനുള്ള സാധ്യതയും പാക് തീവ്രവാദ വിരുദ്ധ അതോറിറ്റി മുന്നറിയിപ്പ് നല്‍കിയിരുന്നു.