മലപ്പുറം: ഇന്റര്‍നാഷണല്‍ യൂനിവേഴ്‌സിറ്റീസ് ലീഗ് അംഗത്വത്തോടെ പ്രവര്‍ത്തിക്കുന്ന കോഓര്‍ഡിനേഷന്‍ ഓഫ് ഇസ്‌ലാമിക് കോളജസിന്റെ (സി.ഐ.സി) വാര്‍ഷിക ജനറല്‍ബോഡി യോഗം (വാഫി സെനറ്റ്) മലപ്പുറം ഡി.ടി.പി.സി ഹാളില്‍ നടന്നു.
സി.ഐ.സി റെക്ടര്‍ സയ്യിദ് ഹൈദരലി ശിഹാബ് തങ്ങള്‍ അധ്യക്ഷനായി. അക്കാദമിക് കൗണ്‍സില്‍ ഡയറക്ടര്‍ സെയ്ത് മുഹമ്മദ് നിസാമി ഉദ്ഘാടനം ചെയ്തു. വാഫി പ്രിലിമിനറി ഘട്ടത്തില്‍ അറബി ഭാഷയുടെ നാല് ശേഷികളില്‍ ഊന്നല്‍ നല്‍കുക, കോളജുകളിലെ അടിസ്ഥാനസൗകര്യങ്ങള്‍ മെച്ചപ്പെടുത്തുക തുടങ്ങിയ പ്രമേയം സെനറ്റ് പാസാക്കി. യോഗത്തില്‍ സി.ഐ.സി കോഓര്‍ഡിനേറ്റര്‍ പ്രൊഫ. അബ്ദുല്‍ ഹകീം ഫൈസി ആദൃശ്ശേരി വാര്‍ഷിക റിപ്പോര്‍ട്ട് അവതരിപ്പിച്ചു.
പാണക്കാട് സയ്യിദ് ഹൈദരലി ശിഹാബ് തങ്ങള്‍ റെക്ടറും കെ. ടി. ഹംസ മുസ്‌ലിയാര്‍, ചെറുവാളൂര്‍ ഹൈദ്രോസ് മുസ്‌ലിയാര്‍, കെ.എ റഹ്മാന്‍ ഫൈസി, അബ്ദുല്‍ ലത്തീഫ് ഫൈസി പാതിരമണ്ണ എന്നിവര്‍ അസി.റെക്ടര്‍മാരും പ്രൊഫ.അബ്ദുല്‍ ഹകീം ഫൈസി ആദൃശ്ശേരി കോഓര്‍ഡിനേറ്ററും ഹബീബുല്ല ഫൈസി തൂത, അഹ്മദ് വാഫി ഫൈസി കക്കാട്, ഡോ. താജുദ്ദീന്‍ വാഫി, ഡോ. ഹസന്‍ ശരീഫ് വാഫി തുടങ്ങിയവര്‍ അസി. കോഓര്‍ഡിനേറ്റര്‍മാരും അലി ഫൈസി തൂത ട്രഷററുമായുള്ള പുതിയ ഭരണനിര്‍വഹണസമിതി നിലവില്‍വന്നു. പ്രൊഫ.സെയ്ത് മുഹമ്മദ് നിസാമിയെ അക്കാദമിക് കൗണ്‍സില്‍ ഡയറക്ടറായും പ്രൊഫ.കെ. ആലിക്കുട്ടി മുസ്‌ലിയാരെ പരീക്ഷാ ബോര്‍ഡ് കണ്‍ട്രോളറായും തെരഞ്ഞെടുത്തു. സയ്യിദ് സാബിഖലി ശിഹാബ് തങ്ങള്‍ ഫൈനാന്‍സ് കമ്മിറ്റി ഡയറക്ടറും അബ്ദുനാസര്‍ ഹാജി ചൊക്ലി പബ്ലിഷിങ്ങ് ബ്യൂറോ ഡയറക്ടറുമാണ്.
കെ.എ റഹ്മാന്‍ ഫൈസി, ഹംസക്കുട്ടി ബാഖവി ആദൃശ്ശേരി, ചെറുവാളൂര്‍ ഹൈദ്രൂസ് മുസ്‌ലിയാര്‍, ഡോ.എന്‍.എ.എം അബ്ദുല്‍ ഖാദര്‍, പിണങ്ങോട് അബൂബക്കര്‍, ഇബ്‌റാഹീം ഫൈസി റിപ്പണ്‍, ഹബീബുല്ല ഫൈസി, അഹ്മദ് വാഫി ഫൈസി കക്കാട്, അലി ഫൈസി തൂത, ഹമീദ് വാഫി കുരുവമ്പലം, ഖാലിദ് ആതവനാട്  പങ്കെടുത്തു.