മണ്ണഞ്ചേരി (ആലപ്പുഴ): കേരളാ കോണ്‍ഗ്രസ് മാണി വിഭാഗത്തേയും മുസ്‌ലിം ലീഗിനെയും സി.പി.എം സ്വാഗതംചെയ്തത് സി.പി.ഐയ്ക്കുള്ള മുന്നറിയിപ്പെന്നു സൂചന. വിവിധ ജില്ലകളിലുള്ള സി.പി.എം അസംതൃപ്തരെ സി.പി.ഐയുടെ നേതൃത്വത്തില്‍ സമ്മേളനങ്ങള്‍നടത്തി പാര്‍ട്ടിയിലേക്ക് സ്വീകരിക്കുന്നത് ഇപ്പോള്‍ വ്യാപകമാണ്. എറണാകുളം, കാസര്‍കോട്, കോട്ടയം, തൃശൂര്‍ എന്നിവിടങ്ങളില്‍ നിരവധി സി.പി.എം വിമതരെ സി.പി.ഐ ഇങ്ങനെ സ്വീകരിച്ചിരുന്നു. ഇത്തരം സമ്മേളനങ്ങളില്‍ സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ തന്നെ നേരിട്ടു പങ്കെടുക്കുകയും ചെയ്തിരുന്നു. സി.പി.എമ്മില്‍ നിന്നും പുറത്തുപോകുന്നവര്‍ ശത്രുപക്ഷത്തേക്ക് പോകാതിരിക്കാനാണ് സി.പി.ഐയുടെ ഈ നിലപാടെന്നാണ് പാര്‍ട്ടി വിശദീകരണം.
 വര്‍ഷങ്ങള്‍ക്കു മുന്‍പ് സി.പി.എം വിട്ട് സി.പി.ഐയില്‍ ചേര്‍ന്ന ടി.ജെ ആഞ്ചലോസാണ് ആലപ്പുഴയിലെ സി.പി.ഐയുടെ ഇപ്പോഴത്തെ ജില്ലാ സെക്രട്ടറിയെന്നും പാര്‍ട്ടിയിലെത്തുന്നവര്‍ക്ക് അര്‍ഹമായ സ്ഥാനമാനങ്ങള്‍ സി.പി.ഐ നല്‍കുമെന്നും കാനം രാജേന്ദ്രന്‍ പറഞ്ഞിരുന്നു.  ഇതുമായി ബന്ധപ്പെട്ട്  സി.പി.എം ജില്ലാ കമ്മിറ്റികള്‍ സി.പി.ഐ നേതൃത്വത്തിനെതിരേ തിരിയുകയും ചെയ്തു. സി.പി.ഐയുടെ പുതിയനീക്കം കേരളഘടകത്തിന് പൊതുവേ ക്ഷീണം ഉണ്ടാക്കുമെന്ന തിരിച്ചറിവാണ് സി.പി.എമ്മിന്റെ പുതിയ നീക്കത്തിനു പിന്നില്‍. ലീഗും കേരളാ കോണ്‍ഗ്രസും എല്‍.ഡി.എഫിന്റെ ഭാഗമായാല്‍ സി.പി.ഐയുടെ സഹായം ആവശ്യമില്ലെന്ന് വരുത്തിതീര്‍ക്കുകയാണ് സി.പി.എമ്മിന്റെ ലക്ഷ്യം. പുതിയ നീക്കത്തിലൂടെ സി.പി.ഐയെയും പാര്‍ട്ടിയിലെ അസംതൃപ്തരെയും നിലയ്ക്കുനിര്‍ത്താന്‍ കഴിയുമെന്നാണ് സി.പി.എം നേതൃത്വം കരുതുന്നത്.