കണ്ണൂര്‍: ദേശീയ റോള്‍ബോള്‍ ചാംപ്യന്‍ഷിപ്പിനായി കണ്ണൂരില്‍ നടന്ന സംസ്ഥാന സെലക്ഷന്‍ ക്യാംപില്‍ പെണ്‍കുട്ടികളുടെ കണ്ണുനീര്‍. ഛത്തീസ്ഗഢിലേക്ക് ടീം യാത്ര പുറപ്പെടാനിരിക്കെ മതിയായ പ്രാതിനിധ്യം ഇല്ലെന്ന് പറഞ്ഞ് പെണ്‍കുട്ടികളെ സെലക്ഷനില്‍ നിന്ന് ഒഴിവാക്കുകയായിരുന്നു. സെലക്ഷന്‍ നടത്താന്‍ എട്ട് ജില്ലകളുടെയെങ്കിലും പ്രാതിനിധ്യം വേണമെന്ന ഹൈക്കോടതി നിര്‍ദേശമാണ് വിനയായത്.
ഓരോ വിഭാഗത്തിലും എട്ട് ജില്ലകളില്‍ നിന്നെങ്കിലും ആളുണ്ടെങ്കില്‍ സെലക്ഷന്‍ തുടങ്ങാമെന്ന് പൊരിവെയിലില്‍ മണിക്കൂറുകള്‍ കാത്തിരുന്ന കുട്ടികളെ അധികൃതര്‍ അറിയിക്കുകയായിരുന്നു. ജൂനിയര്‍, സീനിയര്‍ ആണ്‍കുട്ടികളുടെ വിഭാഗത്തില്‍ ഹൈക്കോടതി നിര്‍ദേശമനുസരിച്ചുള്ള ആളായപ്പോള്‍ പെണ്‍കുട്ടികളുടെ പ്രാതിനിധ്യം അഞ്ച് ജില്ലകളില്‍ നിന്ന് മാത്രമായിരുന്നു. ടീം തികയ്ക്കാന്‍ ആളുണ്ടായിരുന്നിട്ടും മണിക്കൂറുകളുടെ കാത്തിരിപ്പും യാത്രയും തയാറെടുപ്പും വെറുതെയായി. അസോസിയേഷനുകളും വകുപ്പും തമ്മിലുള്ള പോരിനൊടുവില്‍ ഹൈക്കോടതി വിധി നേടി പണം കെട്ടിവച്ച് എത്തിയ അസോസിയേഷനുകളും ഇതോടെ പ്രതിസന്ധിയിലായി.
വിധിയില്‍ മൊത്തം എട്ട് ജില്ലകളുടെ പ്രാതിനിധ്യം മാത്രമാണ് പറഞ്ഞിരിക്കുന്നതെന്നാണ് ഇവരുടെ വാദം. എന്നാല്‍ ഹൈക്കോടതി നിര്‍ദേശം ഉള്ളതിനാല്‍ മുന്‍ വര്‍ഷങ്ങളിലേത് പോലെ സെലക്ഷന്‍ നടത്താനാകില്ലെന്ന നിപാടില്‍ അധികൃതര്‍ ഉറച്ച് നില്‍ക്കുകയായിരുന്നു. അസോസിയേഷന്‍- വകുപ്പ് തര്‍ക്കത്തിനിടയില്‍പ്പെട്ട് കുത്തഴിഞ്ഞ സംവിധാനത്തിന്റെ ഇരകളായത് താരങ്ങളും, തുലാസിലായത് അവരുടെ ഭാവിയും.