കെയ്‌റോ: അറബ് ലീഗ് മന്ത്രിമാരുടെ യോഗത്തില്‍ ഇറാനെതിരേ ശക്തമായ വിമര്‍ശനവുമായി സഊദിയും ബഹ്‌റൈനും. മേഖലയിലെ സമാധാനാന്തരീക്ഷം തകര്‍ക്കുന്ന ഇറാന്റെ നടപടികള്‍ നോക്കിനില്‍ക്കില്ലെന്നായിരുന്നു സഊദിയുടെ മുന്നറിയിപ്പ്. ഇറാന്റെ കീഴിലുള്ള ഹിസ്ബുല്ലയാണ് ലെബനാനെ നിയന്ത്രിക്കുന്നതെന്നു ബഹ്‌റൈനും ആരോപിച്ചു.
സഊദി മുന്‍കൈയെടുത്താണ് കെയ്‌റോയില്‍ അറബ് ലീഗ് രാജ്യങ്ങളിലെ വിദേശകാര്യ മന്ത്രിമാരുടെ അടിയന്തര യോഗം വിളിച്ചുചേര്‍ത്തത്. കെയ്‌റോയിലെ അറബ് ലീഗ് ആസ്ഥാനത്തായിരുന്നു യോഗം. ഈ മാസം ആദ്യം സഊദിയെ ലക്ഷ്യമാക്കിയ മിസൈല്‍ റിയാദിനു സമീപത്ത് സഊദി തടുത്തിരുന്നു. ഇത്തരത്തില്‍ നിരവധി തവണ മിസൈല്‍ ആക്രമണമുണ്ടായെന്നാണ് വിവരം. ഈ ആക്രമണത്തെ അറബ് ലീഗും ശക്തമായ ഭാഷയില്‍ വിമര്‍ശിച്ചിരുന്നു. തുടര്‍ന്നാണ് മേഖലയിലെ പ്രശ്‌നങ്ങള്‍ ചര്‍ച്ച ചെയ്യാന്‍ യോഗം വിളിച്ചത്.
സഊദിയുടെയും അവിടത്തെ പൗരന്‍മാരുടെയും സുരക്ഷ ഉറപ്പാക്കുന്നതിനായി ചെറുത്തുനില്‍പിനു മടിക്കില്ലെന്നു സഊദി വിദേശകാര്യ മന്ത്രി ആദില്‍ അല്‍ ജുബൈര്‍ വ്യക്തമാക്കി. രാജ്യത്തെ സംരക്ഷിക്കുന്നതിനുള്ള സഊദിയുടെ നീക്കങ്ങള്‍ക്കു വിവിധ രാജ്യങ്ങള്‍ പിന്തുണ വാഗ്ദാനം ചെയ്തിട്ടുമുണ്ട്. ഇറാനെതിരേ യു.എന്‍ സുരക്ഷാ കൗണ്‍സിലിനു റിപ്പോര്‍ട്ട് നല്‍കാനും അറബ് ലീഗ് യോഗം തീരുമാനിച്ചിട്ടുണ്ട്.
ഹിസ്ബുല്ല തീവ്രവാദ ഗ്രൂപ്പാണ് ഇറാന്റെ വലിയ ആയുധമെന്നു ബഹ്‌റൈന്‍ വിദേശകാര്യ മന്ത്രി ഷെയ്ഖ് ഖാലിദ് ബിന്‍ അഹ്മദ് അല്‍ ഖലീഫ യോഗത്തില്‍ ആരോപിച്ചു. ലെബനാനില്‍ മാത്രമല്ല ഹിസ്ബുല്ല ആക്രമണങ്ങള്‍ നടത്തുന്നതെന്നും മറ്റു രാജ്യങ്ങളുടെ അതിര്‍ത്തി കടന്നും അവര്‍ അതിക്രമം കാണിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു. ലെബനാല്‍ ഹിസ്ബുല്ലയെന്ന തീവ്രവാദ ഗ്രൂപ്പിന്റെ നിയന്ത്രണത്തിലാണെന്നായിരുന്നു അദ്ദേഹം പറഞ്ഞത്.അതേസമയം, യോഗത്തില്‍ ലെബനാന്‍ വിദേശകാര്യ മന്ത്രി പങ്കെടുക്കാത്തതു വിവാദമായിട്ടുണ്ട്.