തിരുവനന്തപുരം: ഓഖി ചുഴലിക്കാറ്റിനെ തുടര്‍ന്ന് യുദ്ധകാല അടിസ്ഥാനത്തിലുള്ള രക്ഷാപ്രവര്‍ത്തനമാണ് സംസ്ഥാനത്ത് നടന്നതെന്ന് മുഖ്യമന്ത്രി പിണറായി വിജയന്‍.

ചുഴലിക്കാറ്റില്‍ മരിച്ചവരുടെ കുടുംബാഗങ്ങള്‍ക്ക് 10 ലക്ഷം രൂപ ധനസഹായം നല്‍കും. പരുക്കേറ്റവര്‍ക്ക് 20,000 രൂപ നഷ്ടപരിഹാരം നല്‍കാനും, സൗജന്യ ചികിത്സ നല്‍കാനും തീരുമാനിച്ചതായി മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു.

12 ബോട്ടുകളിലായി 138 പേര്‍ ലക്ഷദ്വീപിലുണ്ട്. ബോട്ടും ഉപകരണങ്ങളും നഷ്ടപ്പെട്ടവര്‍ക്ക് സഹായം നല്‍കും. തുക ഫിഷറീസ് വകുപ്പ് നിശ്ചയിക്കും.

തീരദേശ കുടുംബങ്ങള്‍ക്ക് ഒരാഴ്ച സൗജന്യ റേഷന്‍ അനുവദിക്കും. 529 കുടുംബങ്ങള്‍ സംസ്ഥാനത്ത് ദുരിതാശ്വാസ ക്യാംപുകളില്‍ കഴിയുന്നുണ്ട്.

നാവിക സേനയും വ്യോമസേനയും കോസ്റ്റ് ഗാര്‍ഡും അഭിനന്ദനമായ പ്രവര്‍ത്തനമാണ് നടത്തുന്നതെന്നും മുഖ്യമന്ത്രി പറഞ്ഞു. ഇവരോടെല്ലാം സര്‍ക്കാറിനു നന്ദിയുണ്ട്.

മത്സ്യത്തൊഴിലാളികള്‍ക്ക് വിവരം കൃത്യസമത്ത് എത്താത്തതാണ് പ്രശ്‌നങ്ങള്‍ വഷളാക്കിയത്. ഭാവിയില്‍ ഓരോ തൊഴിലാളിക്കും വിവരം ലഭിക്കുന്ന രീതിയില്‍ സംവിധാനം ഒരുക്കുമെന്നും മുഖ്യമന്ത്രി പറഞ്ഞു.