കൊണ്ടോട്ടി: ഗൃഹപ്രവേശ ചടങ്ങില്‍ പങ്കെടുത്ത് മടങ്ങിയ സംഘം സഞ്ചരിച്ച ജീപ്പ് 10 മീറ്ററോളം താഴ്ചയിലേക്ക് മറിഞ്ഞ് 12പേര്‍ക്ക് പരുക്കേറ്റു. കൊണ്ടോട്ടി തിരൂരങ്ങാടി റോഡില്‍ തറയിട്ടാലില്‍ ഞായറാഴ്ച മൂന്നരയോടെയാണ് അപകടം.
വളവില്‍ നിയന്ത്രണം വിട്ട ജീപ്പ് താഴ്ചയിലേക്ക് പതിക്കുകയായിരുന്നു. അപകടത്തില്‍ ഇരിങ്ങല്ലൂര്‍ സ്വദേശികളായ അന്‍വര്‍ (28), പോക്കര്‍ (60), അസ്മ (22), മുഹ്‌സിന്‍ (28), ദിരീമ (50), ആസ്യ (45), ഷിഫ (10), സുല്‍ഫത്ത് (25) ഷിഫ (ആറ്) എന്നിവര്‍ക്ക് കൂടാതെ രണ്ടു പിഞ്ചുകുട്ടികള്‍ക്കും പരുക്കേറ്റു.
ഓടിക്കൂടിയ നാട്ടുകാര്‍ പരുക്കേറ്റവരെ കൊണ്ടോട്ടിയിലെ സ്വകാര്യ ആശുപത്രിയില്‍ എത്തിച്ചു. ഗുരുതരമായി പരുക്കേറ്റ അന്‍വര്‍, പോക്കര്‍, അസ്മ എന്നിവരെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. മിക്കവര്‍ക്കും തലക്കാണ് പരുക്കേറ്റത്.