ലണ്ടന്‍: ബ്രിട്ടീഷ് പ്രധാനമന്ത്രി തെരേസാ മേ അംഗീകരിച്ച ബ്രെക്‌സിറ്റ് ഉടമ്പടികള്‍ നിയമപരമായ ബാധ്യതയല്ലെന്ന് ബ്രെക്‌സിറ്റ് മധ്യസ്ഥന്‍ ഡെവിഡ് ഡെവിസ് പറഞ്ഞു. തെരേസാ മേ അവരുടെ സന്നദ്ധത അറിയിച്ചതായി മാത്രമേ കണക്കാക്കാനാകൂവെന്നും അദ്ദേഹം പറഞ്ഞു.
യൂറോപ്യന്‍ യൂനിയനും ബ്രിട്ടനും പരസ്പരം വ്യാപാര കരാറിലെത്താനായില്ലെങ്കില്‍ അത് ബ്രെക്‌സിറ്റിനെ ബാധിക്കില്ലെന്നും അദ്ദേഹം പറഞ്ഞു. ബ്രെക്‌സിറ്റ് ചര്‍ച്ചകളുടെ അടുത്തഘട്ടം ആരംഭിക്കുന്നതിന്റെ ഭാഗമായി വെള്ളിയാഴ്ച നടന്ന സംയുക്ത ഇ.യു- ബ്രിട്ടന്‍ വാര്‍ത്താസമ്മേളനത്തിനു പിറകെയാണ് ഡെവിസിന്റെ പ്രസ്താവന പുറത്തുവരുന്നത്.
വെള്ളിയാഴ്ച ബ്രസല്‍സില്‍ നടന്ന ഇ.യു- യു.കെ യോഗത്തില്‍ ഉരുത്തിരിഞ്ഞുവന്ന ബ്രെക്‌സിറ്റ് ഉടമ്പടിയില്‍ തെരേസാ മേ ഒപ്പുവച്ചിരുന്നു. ഇ.യു, ബ്രിട്ടീഷ് പൗരന്മാരുടെ അവകാശങ്ങള്‍ ഒരുപോലെ പരിഗണിച്ചുകൊണ്ടുള്ള ഫോര്‍മുലയ്ക്കാണു യോഗത്തില്‍ അംഗീകാരം ലഭിച്ചത്. വ്യാഴാഴ്ച നടക്കുന്ന ഉച്ചകോടിക്കുശേഷം അടുത്ത ഘട്ട ചര്‍ച്ചകള്‍ ആരംഭിക്കുമെന്നാണു കരുതപ്പെടുന്നത്.