ഹാമില്‍ട്ടന്‍: ന്യൂസിലന്‍ഡിനെതിരായ രണ്ടാം ക്രിക്കറ്റ് ടെസ്റ്റില്‍ വെസ്റ്റിന്‍ഡീസിന് 444 റണ്‍സിന്റെ കൂറ്റന്‍ വിജയ ലക്ഷ്യം. വിജയത്തിലേക്ക് ബാറ്റേന്തുന്ന വിന്‍ഡീസ് മൂന്നാം ദിനം കളി നിര്‍ത്തുമ്പോള്‍ രണ്ട് വിക്കറ്റ് നഷ്ടത്തില്‍ 30 റണ്‍സെന്ന നിലയില്‍.
രണ്ട് ദിവസവും എട്ട് വിക്കറ്റുകളും ശേഷിക്കേ അവര്‍ക്ക് വിജയത്തിലേക്ക് 414 റണ്‍സ് കൂടി. ഒന്നാം ഇന്നിങ്‌സില്‍ ന്യൂസിലന്‍ഡ് 373 റണ്‍സില്‍ പുറത്തായപ്പോള്‍ വിന്‍ഡീസിന്റെ പോരാട്ടം 221ല്‍ അവസാനിച്ചു. രണ്ടാം ഇന്നിങ്‌സില്‍ കിവികള്‍ എട്ട് വിക്കറ്റ് നഷ്ടത്തില്‍ 291 റണ്‍സെടുത്ത് ഡിക്ലയര്‍ ചെയ്ത് വിന്‍ഡീസിന് മുന്നില്‍ കൂറ്റന്‍ വിജയ ലക്ഷ്യം വയ്ക്കുകയായിരുന്നു. കളി നിര്‍ത്തുമ്പോള്‍ ബ്രാത്‌വെയ്റ്റ് (13), ഷെയ്ന്‍ ഹോപ് (ഒന്ന്) എന്നിവരാണ് ക്രീസില്‍.
നേരത്തെ വെറ്ററന്‍ താരം റോസ് ടെയ്‌ലര്‍ നേടിയ സെഞ്ച്വറിയുടെ (പുറത്താകാതെ 107) കരുത്തിലാണ് കിവികള്‍ രണ്ടാം ഇന്നിങ്‌സില്‍ 291ല്‍ എത്തിയത്. കരിയറിലെ 17ാം ടെസ്റ്റ് സെഞ്ച്വറി നേടിയ ടെയ്‌ലര്‍ ന്യൂസിലന്‍ഡിനായി ഏറ്റവും കൂടുതല്‍ ടെസ്റ്റ് ശതകങ്ങള്‍ നേടുന്ന താരമെന്ന റെക്കോര്‍ഡിനൊപ്പമെത്തി.
ഇതിഹാസ താരം മാര്‍ട്ടിന്‍ ക്രോ, നിലവിലെ ക്യാപ്റ്റന്‍ കെയ്ന്‍ വില്ല്യംസന്‍ എന്നിവര്‍ക്കൊപ്പം ടെയ്‌ലര്‍ റെക്കോര്‍ഡ് പങ്കിടുന്നു.