ന്യൂഡല്‍ഹി: ഇന്ത്യന്‍ ഷൂട്ടിങ് ഇതിഹാസവും ഒളിംപിക് സ്വര്‍ണ ജേതാവുമായ അഭിനവ് ബിന്ദ്ര കായിക മന്ത്രാലയത്തിന്റെ ടാര്‍ഗറ്റ് ഒളിംപിക് പോഡിയം (ടി.ഒ.പി) സമിതിയുടെ ചെയര്‍മാന്‍ സ്ഥാനത്ത് നിന്ന് രാജിവച്ചു. ഭിന്നതാത്പര്യ വിഷയം മുന്‍നിര്‍ത്തിയാണ് സ്ഥാനം ഒഴിയുന്നതെന്ന് അദ്ദേഹം കായിക മന്ത്രി രാജ്യവര്‍ധന്‍ സിങ് റാത്തോഡിനയച്ച കത്തില്‍ വ്യക്തമാക്കി. ചെയര്‍മാന്‍ സ്ഥാനത്തിനൊപ്പം ദേശീയ കായിക നിരീക്ഷകന്റെ സ്ഥാനവും അദ്ദേഹം ഒഴിഞ്ഞു. വ്യക്തിപരമായ വിഷയങ്ങളും ഒപ്പം രാജ്യത്തുടനീളം നടത്തുന്ന അഭിനവ് ബിന്ദ്ര ടാര്‍ഗറ്റിങ് പെര്‍ഫോമന്‍സ് സെന്ററുകളുടെ പ്രവര്‍ത്തനങ്ങളില്‍ മുഴുകേണ്ടി വരുന്നതുമാണ് സ്ഥാനം ഒഴിയാന്‍ അദ്ദേഹത്തെ പ്രേരിപ്പിച്ചത്.