പുതിയ ഫീച്ചര്‍ അവതരിപ്പിക്കാനൊരുങ്ങി വാട്‌സ്ആപ്പ്

ഇന്‍സ്റ്റന്റ് മെസേജിഗ് ആപ്പായ വാട്‌സ്ആപ്പില്‍ ഇനി ഫോണ്‍ നമ്പര്‍ ഇല്ലാതെയും സുഹൃത്തുക്കളെ കണ്ടെത്താം. ഏറെ വൈകൈതെ തന്നെ ഈ ഫീച്ചര്‍ വാട്‌സ്ആപ്പ് അവതരിപ്പിക്കും. ഉപഭോക്താക്കളുടെ യൂസര്‍ നെയിം അടിസ്ഥാനമാക്കി സെര്‍ച്ച് ചെയ്യാന്‍ സഹായിക്കുന്ന തരത്തിലാണ് പുതിയ ഫീച്ചര്‍ രൂപകല്‍പ്പന ചെയ്യുക.

ആദ്യ ഘട്ടത്തില്‍ വാട്‌സ്ആപ്പ് വെബ് ഉപഭോക്താക്കളിലേക്ക് പുതിയ ഫീച്ചര്‍ എത്തിക്കാനാണ് പദ്ധതിയിടുന്നത്. തുടര്‍ന്ന് മൊബൈല്‍ വേര്‍ഷനിലും യൂസര്‍ നെയിം അടിസ്ഥാനമാക്കിയുള്ള സെര്‍ച്ച് ഫീച്ചര്‍ ലഭ്യമായേക്കുമെന്നാണ് റിപ്പോര്‍ട്ട്.

പുതിയ ഫീച്ചര്‍ എത്തുന്നതോടെ ഉപഭോക്താക്കള്‍ക്ക് യൂസര്‍ നെയിം, ഫോണ്‍ നമ്പര്‍ അല്ലെങ്കില്‍ പേര് എന്നിവ ഉപയോഗിച്ച് മറ്റ് ഉപഭോക്താക്കളെ 'സെര്‍ച്ച്' ചെയ്യാന്‍ സാധിക്കും. വാട്‌സ്ആപ്പ് വെബ് സെര്‍ച്ച് ബാറിലാണ് ഇതിനായുള്ള സജ്ജീകരണങ്ങള്‍ ഒരുക്കുക. ഈ ഫീച്ചറിലൂടെ ഉപഭോക്താക്കളുമായുള്ള ആശയവിനിമയം കൂടുതല്‍ സുഗമമാക്കാന്‍ കഴിയുമെന്നാണ് വിലയിരുത്തല്‍. നിലവില്‍, ഇന്‍സ്റ്റഗ്രാം, ഫേസ്ബുക്ക് പോലെയുള്ള സോഷ്യല്‍ മീഡിയ പ്ലാറ്റ്‌ഫോമുകളില്‍ യൂസര്‍ നെയിം അടിസ്ഥാനമാക്കിയാണ് സെര്‍ച്ച് സാധ്യമാകുന്നത്.