മകള്‍ ഓണ്‍ലൈന്‍ ഗെയിം കളിച്ച് 1.8 ലക്ഷം രൂപ സമ്പാദിക്കുന്നു; സച്ചിന്റെ ഡീപ് ഫേക്ക് വീഡിയോ; ആശങ്ക പങ്കുവെച്ച് താരം

മുംബൈ: തന്റെ പേരില്‍ സാമൂഹ മാധ്യമങ്ങളില്‍ പ്രചരിക്കുന്ന ഡീപ്‌ഫേക്ക് വീഡിയോയില്‍ ആരാധകര്‍ക്ക് മുന്നറിയിപ്പുമായി സച്ചന്‍ ടെണ്ടുല്‍ക്കര്‍. സ്‌കൈവാര്‍ഡ് ഏവിയേറ്റര്‍ ക്വസ്റ്റ് എന്ന മൊബൈല്‍ ഗെയിം ആപ്ലിക്കേഷനെ പിന്തുണച്ച് താരം സംസാരിക്കുന്ന വീഡിയോയാണ് സൈബറിടങ്ങളില്‍ വ്യാപകമായി പ്രചരിക്കുന്നത്.

തന്റെ മകള്‍ സാറ ഈ ഗെയിം ആപ്ലിക്കേഷന്‍ ഉപയോഗിക്കുന്നതായും, ഇതിലൂടെ ദിനംപ്രതി 1.8 ലക്ഷം രൂപ സമ്പാദിക്കുന്നതായും ഹിന്ദി ഭാഷയിലുള്ള വീഡിയോയില്‍ സച്ചിന്‍ പറയുന്നുണ്ട്. താരത്തിന്റെ മോര്‍ഫ് ചെയ്ത ചിത്രങ്ങളാണ് വീഡിയോക്കായി ഉപയോഗിച്ചിട്ടുള്ളത്. ശബ്ദത്തിലും വ്യത്യാസമുണ്ട്.

ദൃശ്യങ്ങള്‍ വ്യാപകമായതോടെ സച്ചിന്‍ നേരിട്ട് പ്രതികരണവുമായി രംഗത്തെത്തുകയായിരുന്നു. വീഡിയോ വ്യാജമാണെന്നും, ആരും തട്ടിപ്പിനിരയാകരുതെന്നും സച്ചിന്‍ തന്റെ എക്‌സ് പ്ലാറ്റ്‌ഫോമിലൂടെ മുന്നറിയിപ്പ് നല്‍കി.

These videos are fake. It is disturbing to see rampant misuse of technology. Request everyone to report videos, ads & apps like these in large numbers.

Social Media platforms need to be alert and responsive to complaints. Swift action from their end is crucial to stopping the… pic.twitter.com/4MwXthxSOM

— Sachin Tendulkar (@sachin_rt) January 15, 2024

'' ഈ വീഡിയോ വ്യാജമാണ്. സാങ്കേതിക വിദ്യയെ വ്യാപകമായി ദുരുപയോഗം ചെയ്യുന്നത് ആശങ്കപ്പെടുത്തുന്നു. ഇത്തരം വീഡിയോകള്‍, പരസ്യങ്ങള്‍, ആപ്പുകള്‍ എന്നിവയെ കുറിച്ച് ജനങ്ങള്‍ക്ക് മുന്നറിയിപ്പ് നല്‍കണം,' സച്ചിന്‍ എക്‌സില്‍ കുറിച്ചു.

സാമൂഹ്യമാധ്യമങ്ങള്‍ ജാഗ്രത പാലിക്കുകയും, പരാതികളോട് പ്രതികരിക്കണമെന്നും പറഞ്ഞ അദ്ദേഹം വ്യാജ വീഡിയോകളും, തെറ്റായ വിവരങ്ങളും പ്രചരിക്കുന്നത് തടയാന്‍ ദ്രുതഗതിയില്‍ നടപടികള്‍ കൈകൊള്ളണമെന്നും കൂട്ടിച്ചേര്‍ത്തു.

നേരത്തെ, രശ്മിക മന്ദാനയടക്കമുള്ള നടികളുടെ ഡീപ്‌ഫേക്ക് വീഡിയോ സമൂഹമാധ്യമങ്ങളില്‍ വ്യാപകമായി പ്രചരിച്ചത് വലിയ വിവാദമായിരുന്നു.