മഹാരാജാസ് കോളജിലെ സംഘര്‍ഷം; രണ്ട് എസ്.എഫ്.ഐ നേതാക്കള്‍ക്കളെ അറസ്റ്റ് ചെയ്തു

കൊച്ചി: മഹാരാജാസ് കോളേജിലെ സംഘര്‍ഷവുമായി ബന്ധപ്പെട്ട് രണ്ടു എസ്.എഫ്.ഐ നേതാക്കളെ അറസ്റ്റു ചെയ്തു. എസ്.എഫ്.ഐ ജില്ലാ പ്രസിഡന്റ് പ്രജിത് കെ.ബാബു, വൈസ് പ്രസിഡന്റ് ആശിഷ് എസ്. ആനന്ദ് എന്നിവരെയാണ് അറസ്റ്റ് ചെയ്തിരിക്കുന്നത്. കെ.എസ്.യു, ഫ്രട്ടേണിറ്റി പ്രവര്‍ത്തകരെ മര്‍ദിച്ച കേസിലാണ് ആശുപത്രി സംരക്ഷണ നിയമപ്രകാരം എസ്.എഫ്.ഐ പ്രവര്‍ത്തകരെ അറസ്റ്റ് ചെയ്തിരിക്കുന്നത്. എറണാകുളം സെന്‍ട്രല്‍ പൊലീസ് കലൂരില്‍നിന്നാണ് പ്രവര്‍ത്തകരെ അറസ്റ്റ് ചെയ്തത്.

കോളജിലെ സംഘര്‍ഷത്തില്‍ പരുക്കേറ്റ് ആശുപത്രിയില്‍ പ്രവേശിപ്പിച്ച ഫ്രറ്റേണിറ്റി പ്രവര്‍ത്തകന്‍ ബിലാലിനെ ആംബുലന്‍സില്‍ കയറിയും എസ്.എഫ്.ഐ പ്രവര്‍ത്തകര്‍ ക്രൂരമായി മര്‍ദിച്ചിരുന്നു. എറണാകുളം ജില്ലാ ആശുപത്രിക്ക് മുന്നില്‍ പൊലീസ് സാന്നിധ്യത്തിലായിരുന്നു എസ്.എഫ്.ഐ പ്രവര്‍ത്തകരുടെ ആക്രമണം. ഇതിന്റെ ദൃശ്യങ്ങള്‍ പുറത്തുവന്നിരുന്നു.

എസ്.എഫ്.ഐ യൂനിറ്റ് സെക്രട്ടറിയെ കുത്തിക്കൊലപ്പെടുത്താന്‍ ശ്രമിച്ച കേസിലെ എട്ടാം പ്രതിയായ കെ.എസ്.യു പ്രവര്‍ത്തകന്‍ ഈ കേസില്‍ നേരത്തെ അറസ്റ്റിലായിരുന്നു.