രാമക്ഷേത്ര പ്രതിഷ്ഠാ തത്സമയ സംപ്രേഷണം സ്റ്റാലിന്‍ സര്‍ക്കാര്‍ നിരോധിച്ചെന്ന് നിര്‍മല സീതാ രാമന്‍

ചെന്നൈ: രാമക്ഷേത്ര പ്രതിഷ്ഠാദിന ചടങ്ങിന്റെ തത്സമയ സംപ്രേഷണം സ്റ്റാലിന്‍ സര്‍ക്കാര്‍ നിരോധിച്ചുവെന്ന് കേന്ദ്ര ധനമന്ത്രി നിര്‍മല സീതാരാമന്‍. ക്ഷേത്രങ്ങളില്‍ ഇതുമായി ബന്ധപ്പെട്ട പരിപാടികള്‍ നടത്താന്‍ പൊലിസ് അനുമതി നല്‍കുന്നില്ലെന്നും നിര്‍മല സീതാരാമന്‍ ആരോപിച്ചു. തന്റെ എക്‌സ് പ്ലാറ്റ്‌പോമിലാണ് അവരുടെ ആരോപണം.

രാമക്ഷേത്രത്തിന്റെ പ്രതിഷ്ഠാചടങ്ങ് തത്സമയം സംപ്രേഷണം ചെയ്യുന്നതില്‍ നിന്നും ആളുകളെ സ്റ്റാലിന്‍ സര്‍ക്കാര്‍ തടയുകയാണ്. തമിഴ്‌നാട്ടില്‍ 200ഓളം രാമക്ഷേത്രങ്ങളുണ്ട്. എന്നാല്‍, ഈ ക്ഷേത്രങ്ങളില്‍ പൂജയോ പ്രസാദ വിതരണമോ അന്നദാനമോ നടത്താന്‍ അനുവദിക്കുന്നില്ല. ക്ഷേത്രങ്ങള്‍ സ്വകാര്യമായി പരിപാടികള്‍ സംഘടിപ്പിക്കുന്നതിനേയും തമിഴ്‌നാട് സര്‍ക്കാര്‍ എതിര്‍ക്കുകയാണെന്നും നിര്‍മല സീതാരാമന്‍ ആരോപിക്കുന്നു.

അനൗദ്യോഗികമായി തമിഴ്‌നാട് സര്‍ക്കാര്‍ പറയുന്നത് ക്ഷേത്ര പ്രതിഷ്ഠ ചടങ്ങ് തത്സമയം പ്രദര്‍ശിപ്പിച്ചാല്‍ ക്രമസമാധാന പ്രശ്‌നമുണ്ടാകുമെന്നാണ്. എന്നാല്‍, ബാബരി കേസിന്റെ വിധി വന്നപ്പോള്‍ തമിഴ്‌നാട്ടില്‍ ക്രമസമാധാന പ്രശ്‌നങ്ങളുണ്ടായില്ല. പ്രധാനമന്ത്രി രാമക്ഷേത്രത്തിന് തറക്കല്ലിട്ടപ്പോഴും തമിഴ്‌നാട്ടില്‍ പ്രശ്‌നമുണ്ടായില്ല. തമിഴ്‌നാട്ടിലെ ഡി.എം.കെ സര്‍ക്കാര്‍ ഹിന്ദുവിരുദ്ധമായി മാറിയെന്നും നിര്‍മല സീതാരാമന്‍ ആരോപിച്ചു.

TN govt has banned watching live telecast of #AyodhaRamMandir programmes of 22 Jan 24. In TN there are over 200 temples for Shri Ram. In HR&CE managed temples no puja/bhajan/prasadam/annadanam in the name of Shri Ram is allowed. Police are stopping privately held temples also… pic.twitter.com/G3tNuO97xS

— Nirmala Sitharaman (@nsitharaman) January 21, 2024

അതേസമയം, നിര്‍മല സീതാരാമന്റെ പ്രസ്താവനക്കെതിരെ ഡി.എം.കെ മന്ത്രി പി.കെ.ശേഖര്‍ ബാബു രംഗത്തെത്തി. നിര്‍മല വ്യാജ പ്രചാരണം നടത്തുന്നതിനെ ശക്തമായി അപലപിക്കുകയാണ്. സേലത്ത് നടക്കുന്ന ഡി.എം.കെ യൂത്ത് കോണ്‍ഫറന്‍സില്‍ നിന്നും ശ്രദ്ധതിരിക്കുകയാണ് നിര്‍മലയുടെ ലക്ഷ്യം. പ്രതിഷ്ഠാദിനത്തില്‍ സൗജന്യ ഭക്ഷണം വിതരണം ചെയ്യുന്നതിനും പൂജകള്‍ നടത്തുന്നതിനും ഒരു നിയന്ത്രണവുമില്ലെന്നും അദ്ദേഹം പറഞ്ഞു.

pic.twitter.com/BuMjSEHAun

— P.K. Sekar Babu (@PKSekarbabu) January 21, 2024

നേരത്തെ ഡി.എം.കെ മന്ത്രിയും സ്റ്റാലിന്റെ മകനുമായ ഉദയനിധി സ്റ്റാലിന്‍ പള്ളി പൊളിച്ച് രാമക്ഷേത്രം നിര്‍മിക്കുന്നതിനെയാണ് തങ്ങള്‍ എതിര്‍ക്കുന്നതെന്ന് പറഞ്ഞിരുന്നു. ഡി.എം.കെ അടക്കമുള്ള പ്രധാന പ്രതിപക്ഷ പാര്‍ട്ടികളെല്ലാം രാമക്ഷേത്രത്തിന്റെ പ്രതിഷ്ഠ ചടങ്ങില്‍ പങ്കെടുക്കുന്നില്ല.