ദുബൈ: 75-മത് ഇന്ത്യന്‍ റിപ്പബ്‌ളിക് ദിനാഘോഷം ഈ വര്‍ഷവും യുഎഇയിലെ ഇന്ത്യന്‍ സമൂഹം വിപുലമായി ആഘോഷിക്കും. ഇന്ത്യന്‍ എംബസി, കോണ്‍സുലേറ്റുകളുടെ ആഭിമുഖ്യത്തിലുള്ള ഔദ്യോഗിക പരിപാടികള്‍ക്ക് പുറമെ, ഇന്ത്യന്‍ അസോസിയേഷന്‍ ഷാര്‍ജ, എസ്‌കെഎസ്എസ്എഫ്, ഇന്‍കാസ്, കെഎംസിസി തുടങ്ങിയ വിവിധ സംഘടനകളുടെയും വ്യത്യസ്ത ഇന്ത്യന്‍ സ്‌കൂളുകളുടെയും കമ്പനികളുടെയും നേതൃത്വത്തിലും പരിപാടികള്‍ ഒരുക്കുന്നതാണ്. എല്ലാ വര്‍ഷത്തെയും പോലെ 'രാഷ്ട്ര സുരക്ഷക്ക് സൗഹൃദത്തിന്റെ കരുതല്‍' എന്ന ശീര്‍ഷകത്തില്‍ എസ്‌കെഎസ്എസ്എഫ് ഇക്കൊല്ലവും വിവിധ എമിറേറ്റുകളില്‍ പരിപാടികള്‍ നടത്തുന്നുണ്ട്.
ജനുവരി 26ന് വെള്ളിയാഴ്ച അബുദാബിയില്‍ ഇന്ത്യന്‍ എംബസിയുടെയും ദുബൈയില്‍ കോണ്‍സുലേറ്റിന്റെയും നേതൃത്വത്തില്‍ രാവിലെ ദേശീയ പതാക ഉയര്‍ത്തലും മറ്റു പരിപാടികളും സംഘടിപ്പിക്കുന്നതില്‍ ഇന്ത്യന്‍ സമൂഹ പങ്കെടുക്കും. ഇന്ത്യന്‍ എംബസിയില്‍ അംബാസഡര്‍ സഞ്ജയ് സുധീര്‍ ദേശീയ പതാക ഉയര്‍ത്തും. രാവിലെ 7.30നാണ് കോണ്‍സുലേറ്റില്‍ സിജി സതീഷ് കുമാര്‍ ശിവന്‍ ദേശീയ പതാക ഉയര്‍ത്തുക. തുടര്‍ന്ന്, ഇന്ത്യന്‍ പ്രസിഡന്റ് രാഷ്ട്രത്തോടായി നടത്തുന്ന പ്രസംഗത്തിലെ പ്രസക്ത ഭാഗങ്ങള്‍ കോണ്‍സുല്‍ ജനറല്‍  വായിക്കും. ശേഷം, സാംസ്‌കാരിക പരിപാടികള്‍ അരങ്ങേറും.
ദുബൈ താജ് എക്‌സോട്ടിക ഹോട്ടല്‍ ആന്റ് റിസോര്‍ട്ടില്‍ രാത്രി 7 മുതല്‍ 11 മണി വരെ കോണ്‍സുലേറ്റ് ആഭിമുഖ്യത്തില്‍ ഇന്ത്യന്‍ സമൂഹത്തിന്റെ സംഗമവും സാംസ്‌കാരിക പ്രോഗ്രാമുകളുമുണ്ടാകും.