ന്യൂഡല്‍ഹി: സ്ഥാപനത്തിന്റെ ന്യൂനപക്ഷപദവി സംബന്ധിച്ചു കേന്ദ്രസര്‍ക്കാര്‍ രാഷ്ട്രീയം കളിക്കുകയാണെന്ന് അലിഗഡ് മുസ്‌ലിം സര്‍വകലാശാല സുപ്രിംകോടതിയില്‍ പറഞ്ഞു.

അലിഗഡിന്റെ ന്യൂനപക്ഷപദവിക്കെതിരേ സര്‍ക്കാരിനു നിലപാടെടുക്കാന്‍ കഴിയില്ലെന്നും അത്തരം നടപടികള്‍ ഭരണഘടനാവിരുദ്ധമാണെന്നും സര്‍വകലാശാല സുപ്രിംകോടതിയില്‍ സമര്‍പ്പിച്ച സത്യവാങ്മൂലത്തില്‍ പറഞ്ഞു.

അലിഗഡിന്റെ ന്യൂനപക്ഷപദവി സംബന്ധിച്ച അവകാശം എടുത്തുകളയണമെന്നാവശ്യപ്പെടുന്ന ഹരജിയെ എതിര്‍ത്ത സത്യവാങ്മൂലം, കേന്ദ്രസര്‍ക്കാരിന്റെ നടപടി ഭരണഘടനയ്‌ക്കെതിരായ നീക്കമാണെന്നും ആരോപിച്ചു. പാര്‍ലമെന്റ് പാസാക്കിയെടുത്ത ഒരു നിയമം കേന്ദ്രസര്‍ക്കാരിന് സുപ്രിംകോടതിയില്‍ ചോദ്യംചെയ്യാനാവില്ല. പാര്‍ലമെന്റ് ഒരു നിയമം പാസാക്കിയാല്‍ അതു ഭരണഘടനയുടെ ഭാഗമാവും. അതില്‍ പിന്നീട് ഭേദഗതി വേണമെങ്കില്‍ സുപ്രിംകോടതിയില്‍ ഹരജി നല്‍കിയതുകൊണ്ട് കാര്യമില്ല.

പാര്‍ലമെന്റ് തന്നെ നിയമംകൊണ്ടുവരണം. അലിഗഡിന്റെ ന്യൂനപക്ഷപദവി സംരക്ഷിക്കാനാണ് 1981ല്‍ അന്നത്തെ കേന്ദ്രസര്‍ക്കാര്‍ പാര്‍ലമെന്റില്‍ നിയമം കൊണ്ടുവന്നത്. ന്യൂനപക്ഷപദവി വിഷയത്തില്‍ സുപ്രിംകോടതിയില്‍ നിന്ന് പ്രതികൂല വിധിയുണ്ടായതിനെത്തുടര്‍ന്നാണ് അന്ന് കേന്ദ്രസര്‍ക്കാര്‍ പാര്‍ലമെന്റില്‍ നിയമഭേദഗതി കൊണ്ടുവന്നത്.

അതിനാല്‍ കേന്ദ്രത്തില്‍ സര്‍ക്കാര്‍ മാറിയതുകൊണ്ടുമാത്രം കോടതി മുഖേന ആ നിയമം റദ്ദാക്കാനാവില്ല. ഒരു രാഷ്ട്രീയപ്പാര്‍ട്ടിയുടെ കീഴിലുള്ള സര്‍ക്കാര്‍ കൊണ്ടുവന്ന നിയമം മറ്റൊരു രാഷ്ട്രീയപ്പാര്‍ട്ടിയുടെ കീഴിലുള്ള സര്‍ക്കാര്‍ വന്നു എന്ന കാരണത്താല്‍ മാറ്റാനാവില്ലെന്നും ജൂണ്‍ 30നു കേന്ദ്ര മാനവവിഭവശേഷിമന്ത്രാലയം സമര്‍പ്പിച്ച ഹരജി ചോദ്യംചെയ്തുകൊണ്ട് അലിഗഡ് സര്‍വകലാശാല വിശദീകരിച്ചു.
മാനവവിഭവശേഷി മന്ത്രാലയത്തിന്റെ അപ്പീല്‍ ഭരണഘടനാവിരുദ്ധവും പാര്‍ലമെന്റ് പോലുള്ള അത്യുന്നത സ്ഥാപനത്തെ അവഹേളിക്കലുമാണ്. ഭൂരിപക്ഷസമുദായത്തിനു നൂറുകണക്കിനു സ്ഥാപനങ്ങള്‍ ഉണ്ടായിരിക്കെ ന്യൂനപക്ഷത്തിന്റെ ഒരുസ്ഥാപനം സര്‍ക്കാര്‍ ഏറ്റെടുക്കാതിരിക്കുകയാണു വേണ്ടത്. ന്യൂനപക്ഷസ്ഥാപനം എന്നാല്‍ അതിലെ എല്ലാ വിദ്യാര്‍ഥികളും മുസ്‌ലിംകളാണ് എന്നര്‍ഥമില്ല.

അതില്‍ 50 ശതമാനം മാത്രമെ ന്യൂനപക്ഷവിദ്യാര്‍ഥികളുള്ളൂ. സ്ഥാപനത്തിലെ വി.സി, പി.വി.സി നിയമനങ്ങളിലോ മറ്റോ ഇതുവരെ യാതൊരു വിവാദവും ഉണ്ടായിട്ടില്ലെന്നും സത്യവാങ്മൂലത്തില്‍ വ്യക്തമാക്കി. കേസില്‍ മറുപടി സത്യവാങ്മൂലത്തിന് സമയം വേണമെന്ന കേന്ദ്രസര്‍ക്കാരിന്റെ ആവശ്യം സുപ്രിംകോടതി അംഗീകരിച്ചു. കേസ് മൂന്നാഴ്ച കഴിഞ്ഞ് വീണ്ടും പരിഗണിക്കും.

അലിഗഡിന്റെ പദവി

1875ല്‍ സര്‍ സയ്യിദ് അഹ്മദ് ഖാന്‍ സ്ഥാപിച്ച മുഹമ്മദന്‍ ആംഗ്ലോ ഓറിയന്റല്‍ കോളജ് 1920ലാണ് അലിഗഡ് സര്‍വകലാശാലയായത്. 1951ല്‍ പാര്‍ലമെന്റ് അലിഗഡ് മുസ്‌ലിം സര്‍വകലാശാല നിയമഭേദഗതി പാസാക്കി. 1967ല്‍ ഭേദഗതി ചോദ്യം ചെയ്തു സമര്‍പ്പിക്കപ്പെട്ട ഹരജിയില്‍ സര്‍വകലാശാല ന്യൂനപക്ഷ സ്ഥാപനമല്ലെന്ന് സുപ്രിംകോടതി വിധിച്ചു.

1981ല്‍ സര്‍ക്കാര്‍ വീണ്ടും പാര്‍ലമെന്റില്‍ ഭേദഗതി കൊണ്ടുവന്ന് ന്യൂനപക്ഷ പദവി പുനഃസ്ഥാപിച്ചു. അലിഗഡിനു ന്യൂനപക്ഷ പദവി നല്‍കുന്ന പാര്‍ലമെന്റിന്റെ 1981ലെ നിയമഭേദഗതി അലഹബാദ് ഹൈക്കോടതി പിന്നീട് റദ്ദാക്കി. ഇതിനെതിരേ ഉത്തര്‍പ്രദേശ് സര്‍ക്കാരും യു.പി.എ നേതൃത്വം നല്‍കിയിരുന്ന കേന്ദ്ര സര്‍ക്കാരും 2006ല്‍ സുപ്രിംകോടതിയില്‍ അപ്പീല്‍ നല്‍കി. ആ ഹരജി പിന്‍വലിക്കുന്നതായി കഴിഞ്ഞ ജൂണില്‍ നരേന്ദ്രമോദി സര്‍ക്കാര്‍ സുപ്രിംകോടതിയില്‍ അറിയിക്കുകയായിരുന്നു.

ന്യൂനപക്ഷ പദവിയെ പിന്തുണച്ചു മാനവവിഭവശേഷി മന്ത്രാലയം ഇതുവരെ നല്‍കിയ എല്ലാ കത്തുകളും പിന്‍വലിക്കുന്നുവെന്നാണ് അറ്റോര്‍ണിജനറല്‍ മുകുള്‍ രോഹ്തഗി മന്ത്രാലയത്തിനു വേണ്ടി സമര്‍പ്പിച്ച സത്യവാങ്മൂലത്തില്‍ പറയുന്നത്.