പി.വി. അന്‍വറിന്റെ പാര്‍ക്കിന് ലൈസന്‍സ് പുതുക്കി നല്‍കി പഞ്ചായത്ത്; നടപടി ഹരജി ഹൈക്കോടതി ഇന്ന് പരിഗണിക്കാനിരിക്കെ

കോഴിക്കോട്: പി.വി. അന്‍വര്‍ എം.എല്‍.എയുടെ ഉടമസ്ഥതയിലുള്ള കക്കാടംപൊയിലിലെ പാര്‍ക്കിന് ലൈസന്‍സ് പുതുക്കി നല്‍കി കൂടരഞ്ഞി പഞ്ചായത്ത്. ഏഴ് ലക്ഷം രൂപ ലൈസന്‍സ് ഫീസ് ഈടാക്കിയാണ് പുതുക്കി നല്‍കിയത്. പാര്‍ക്കിന്റെ റവന്യു റിക്കവറി കുടിശിക ഇനത്തില്‍ രണ്ടര ലക്ഷം രൂപ വില്ലേജിലും അടച്ചിട്ടുണ്ട്.

ഉദ്യാനമെന്ന നിലയിലാണ് പാര്‍ക്കിന് അനുമതി മാത്രമാണ് നല്‍കിയിട്ടുള്ളതെന്നും റൈഡുകള്‍ക്ക് അനുമതി നല്‍കിയിട്ടില്ലെന്നും പഞ്ചായത്ത് അധികൃതര്‍ വ്യക്തമാക്കുന്നു. പഞ്ചായത്ത് ലൈസന്‍സ് ഇല്ലാതെയാണ് പാര്‍ക്ക് പ്രവര്‍ത്തിക്കുന്നതെന്ന വിവരാവകാശ രേഖയുടെ അടിസ്ഥാനത്തിലുള്ള ഹരജി ഇന്ന് ഹൈക്കോടതി പരിഗണിക്കാനിരിക്കെയാണ് ലൈസന്‍സ് പുതുക്കി നല്‍കിയത്. കേരള നദീ സംരക്ഷണ സമിതി മുന്‍ ജനറല്‍ സെക്രട്ടറി പി.വി. രാജനാണ് ഹൈക്കോടതിയെ സമീപിച്ചത്.

ലൈസന്‍സിനായി അപൂര്‍ണമായ അപേക്ഷയാണ് നല്‍കിയതെന്നും അപേക്ഷയിലെ പിഴവ് തിരുത്താന്‍ ആവശ്യപ്പെട്ടിട്ടും നല്‍കിയില്ലെന്നും കോടതിയെ പഞ്ചായത്ത് അറിയിച്ചിരുന്നു. എന്നാല്‍, ലൈസന്‍സിനായി അപേക്ഷ ലഭിച്ചിട്ടുണ്ട്. അപേക്ഷയിലെ പിഴവ് കാരണം ലൈസന്‍സ് നല്‍കിയിട്ടില്ല.ആവശ്യമായ അനുബന്ധ രേഖകള്‍ സമര്‍പ്പിച്ചിട്ടില്ലെന്നുമായിരുന്നു സര്‍ക്കാര്‍ കോടതിയെ അറിയച്ചത്.

ലൈസന്‍സ് ഇല്ലാതെ എങ്ങനെ പാര്‍ക്ക് പ്രവര്‍ത്തിക്കും എന്ന് ചോദിച്ച കോടതി ഇക്കാര്യത്തില്‍ ഇന്ന് മറുപടി നല്‍കാന്‍ സര്‍ക്കാറിന് നിര്‍ദ്ദേശം നല്‍കിയിട്ടുണ്ട്. ഉരുള്‍പൊട്ടല്‍ സാധ്യതയടക്കം കണക്കിലെടുത്ത് കലക്ടര്‍ അടച്ച് പൂട്ടിയ പി വി ആര്‍ നാച്വറോ പാര്‍ക്ക് ഭാഗീകമായി തുറക്കാന്‍ മുഖ്യമന്ത്രിയ്ക്ക് കീഴിലുള്ള ദുരന്ത നിവാരണ അതോറിറ്റിയാണ് അനുമതി നല്‍കിയത്. പി വി അന്‍വര്‍ എം എല്‍ എ നല്‍കിയ കത്തിന്റെ അടിസ്ഥാനത്തിലായിരുന്നു ദുരന്ത നിവാരണ അതോറിറ്റിയുടെ നടപടി.