പാര്‍ക്കിങിനെ ചൊല്ലി തര്‍ക്കം; മലപ്പുറത്ത് പൊലിസുകാരനും യുവാവും തമ്മില്‍ കൈയ്യാങ്കളി

മലപ്പുറം: വാഹനം പാര്‍ക്ക് ചെയ്യുന്നതുമായി ബന്ധപ്പെട്ട് പൊലിസുകാരനും യുവാവും തമ്മില്‍ കൈയ്യാങ്കളി. കൊണ്ടോട്ടി പുളിക്കല്‍ സ്വദേശി നൗഫല്‍, കൊണ്ടോട്ടി സ്റ്റേഷനിലെ സിപിഒ സദാഖത്തുള്ള എന്നിവര്‍ തമ്മിലാണ് മല്‍പ്പിടുത്തം ഉണ്ടായത്. സംഭവത്തെ തുടര്‍ന്ന് യുവാവിനെ പൊലീസ് അറസ്റ്റ് ചെയ്തു.

സംഭവത്തിന്റെ ദൃശ്യങ്ങള്‍ പുറത്തുവന്നിട്ടുണ്ട്. ചുറ്റിലും ആളുകള്‍ കൂടിനില്‍ക്കുന്നതും ഇരുവരേയും തടയാന്‍ ശ്രമിക്കുന്നതും ദൃശ്യങ്ങളില്‍ കാണാം.

കൊണ്ടോട്ടിയിലെ 17ല്‍ വച്ച് വാഹനം പാര്‍ക്ക് ചെയ്യുന്നതുമായി ബന്ധപ്പെട്ടാണ് തര്‍ക്കമുണ്ടായത്. ഗതാഗതക്കുരുക്ക് മാറാന്‍ നൗഫലിന്റെ കാര്‍ മാറ്റിയിടണം എന്നാവശ്യപ്പെട്ടെത്തിയ സിപിഒ സദക്കത്തുല്ലയും നൗഫലും തമ്മില്‍ തര്‍ക്കമായി. പൊലീസ് ഉദ്യോഗസ്ഥന്‍ മൊബൈല്‍ ഫോണില്‍ ചിത്രങ്ങള്‍ പകര്‍ത്തുന്നത് ചോദ്യം ചെയ്തതോടെ മല്‍പ്പിടുത്തമായി.

അതേസമയം, കൊണ്ടോട്ടി പൊലീസ് സ്റ്റേഷനിലെ സിപിഎ സദാഖത്തുള്ളയ്‌ക്കെതിരെ പരാതിയുമായി നൗഫലിന്റെ കുടുംബവും രംഗത്തെത്തിയിട്ടുണ്ട്. നൗഫലിനെ വാഹനത്തില്‍ നിന്ന് പിടിച്ചിറക്കി മര്‍ദ്ദിക്കുകയായിരുന്നുവെന്ന് ഒപ്പമുണ്ടായിരുന്ന സഹോദരി മുഹസിന പരാതിയില്‍ പറയുന്നു.